Yente la eskrivana en Yiddish

Metin DELEVİ Judeo-Espanyol
18 Kasım 2020 Çarşamba

Esta semana vos kero azer konoser, una eskrivana djudia, una de las primeras eskrivanas ke entro en la shena de la literatura djudia en Yiddish.

La literatura Yiddish entro en su era moderna en los anyos de 1860, kuando los eskrivanos djudios empesaron a uzar la lingua germaniko-djudio para eskrivir romanes, istoryas i poemas. Munchos de los primeros eskrivanos de esta epoka oy en dia son famozos, komo Solomon Naumovich Rabinovich konosido kon el nombre Shalom Aleichem (1859-1916) i Isaac Leib (I.L.) Peretz (1852-1915).

Entre los ke desharon su nombre en la literatura Yiddish se topa Yente Raybman Serdatzky. I se puede dizir ke es la primera eskrivana djudia de la istorya. Nasida el 15 de Septembre de 1877 en Lituania, Serdatzky era ija de un akademiko ma malgrado sus kalifikasyones akademikos manteniya su famiya  vendyendo mobles uzados. Yente Serdatzky resivyo una edukasyon djudia i sekular. Se ambezo en Alman, Ruso i İvrit. Se engrandesyo en una kaza ke era un lugar de reunion para los eskrivanos Yiddish de Kovno i ansi konosyo la literatura Yiddish del tyempo.

En manseva, lavoro en un magazen de episeriya i despues dirijo un magazin de bakal. En 1905, anyo de la revolusyon rusa se fue a bivir en Varsovia. En Varsovia, entro al sirkolo literario de I.L. Peretz. Su empesijo literera fue kon el roman “Mirl” ke se publiko en la gazeta “Der Weg” (el kamino) ke Peretz era el editor. Peretz le ayudo muncho i publiko munchas eskritas de Serdatsky.

Despues de pasar unos dos anyos en Varsovia, Serdatzky emigro a la Amerika deshando detras un marido i tres ijos. Primero fue a Chicago i de aya a Nueva York. En Nueva York ampeso a lavorar komo dirijente de unas kuantas kazas de komer populares para proves i kontinuo a eskrivir.

Serdaztky publiko istoryas kurtas, skeches i piyesas de teatro kurtos en los jurnales en Yiddish komo Fraye Arbeter Shtime (la boz libre del lavoro) , Fraye Gezelshaft ( la sociedad libre), Tsukunft ( el futuro) Dosnaye Land (la tierra mueva) i Fraynd (amigo).  (Kero travar vuestra atansyon sovre la abondansya de publikasyones en Yiddish en akel tyempo).

Eya publiko tambyen, regularmente, istoryas en el Forverts (adelantre) ande se izo en kurto tyempo una de los editores ayudantes.

Despues de una diskusyon sovre su pagada i pleto kon Abraham Cahan, el editor de The Forward, en 1922, Serdatzky desho de eskrivir durante 27 anyos. En estos anyos se mantuvo en alkilando kamaretas para los estudyantes.  Finalmente, empeso a publikar de muevo en el anyo 1950, prinsipalmente en Nyu Yorker Vokhnblat. Entre 1949 i 1955 eya publiko unas 30 istoryas en este peryodiko.

Eya fue la otora de solo un livro Geklibehe Shriftn (antolojiya de eskritos) ke se publiko en Nueva York por Hebrew Publishing Company, en 1913.

En los anyos 2000, munchos de sus eskritas fueron transladados i re-publikados.

El lavoro de Serdatzky se sentro sovre los sujetos de las mujeres imigrantes kon pasados antesedentes similares al suyo. Las vidas de las mujeres tratados por Serdatzky no fueron fasiles. El mundo ideal ke bushkavan a erijir era inalkansavle afilu imposivle, de otra parte eyas eran eksplotadas por los ombres en sus vidas i alienadas por los  aktivistos kon el ke bushkavan asosiyarse en la aksyon del aktivizmo.

Yente Serdatzky muryo el 1 de mayo de 1962.

Siz de yorumunuzu yapın

Tüm Yorumları Görün