Biden: el muevo Prezidente de los Estados Unidos

Silvyo OVADYA Judeo-Espanyol
11 Kasım 2020 Çarşamba

Kuatro anyos antes, despues de las eleksyones en los Estados Unidos,  la mas grande partida de los Amerikanos estavan siguros ke Hillary Clinton iva ser la primera mujer ke iva resivir el posto de  prezidente de los Estados Unidos. Hillary gano 3 milyones mas munchos de votos ke Trump; ma no reusho a ganar. Es Donald Trump ke fue el prezidente de los Estados Unidos. Malgrado ke resivio 3 miliones manko de votos de Hillary Clinton kon sus delegados elijidos reusho a ganar. Ya savesh ke un prezidente en los Estados Unidos puede ser elijido solamente dos vezes. I dos semanas antes tuvo lugar las muevas eleksyones en los Estados Unidos. I es por la primera vez ke tanta djente votaron para el muevo prezidente. Votaron indosen a la kasha elektoral o embiyando sus votos por la posta. Deke tanta djente kijeron votar? Kijeron votar porke Biden era el mijor kandidato de prezidente en la istoria del payis? Esto siguro ke no. Puedeser anyos antes Biden puediya ser mas atraktivo ke oy en diya. Ma tanta djente votaron porke no kerian un ombre komo Trump. Ya savemos ke Biden entro a la politika muy mansevo. El fue Senator a la aedad de 29 anyos en 1972. El fue uno de los mas mansevos senatores en la istoria de los Estados Unidos. En el anyo 1972, serka de la fiesta de Noel su mujer kon sus tres kriaturas pasaron un aksidente kon sus arabas i Biden pedriyo su mujer i su ija. Bivyo despues kon sus dos ijos. Se kazo por la segunda vez unos kuantos anyos despues. Ya savemos ke el era el vise prezidente de Obama; el primer prezidente de los Estados Unidos ke no era un WASP (White, Anglosakson, Protestan); ya savemos ke Kenedy era Katoliko, ma uno ke no es de rasa blanka no era muy valable para uno ke va ser prezidente. Ma lo eskojeron. Deke eskojeron a Biden? Kreo por ke no kijeron un loko. Trump puedeser era un ombre muy kapache. Puedeser ayudo muncho a Israel. Mizmo si no acheto lo ke la Turkiya estava demandando fue un amigo de Erdogan. Agora vamos a ver si la politika de los Estados Unidos va trokar kon la Turkiya i kon İsrael. Kreo ke la grande partida de los Amerikanos komo todas las personas no keren mas prezidentes ke kada diya estan terorizando la djente en todos los sujetos.

   Oy en diya vemos ke la mueva moda para ser prezidente es de komportarse de una manera diferente, terorizando las personas i en no dando repozo. Kreo ke la djente se kanso de esto.

   Kualo es la demokrasia en los Estados Unidos? La demokrasia es ke una mujer komo Kamala Harris, de padre Jamaikano i de madre Indiana puede ser no solo senatora ma mizmo vise prezidente de un payis muy emportante komo los Estados Unidos. Biden oy en diya tyene 78 anyos i disho ke kere ser prezidente solo para un periodo. Si le afita una koza es una mujer, i una mujer ke no es de rasa blanka ke va ser la prezidente del payis.

  Para mi no importa la rasa ni la orijin de la persona. Ya se ke Obama o Kamala Harris son Amerikanos i halis Amerikanos. I ya se ke no van a pensar en el entereso de la Jamaika o de la India. Eya va pensar solo en el entereso de su payis. Vemos ke Trump se fue a la djustisia para ke no acheten los rezultados en siertas sivdades. Ma no fue achetado porke las provas no eran bastante valavles.

   Espero ke Biden i los Estados Unidos van a pasar kuatro anyos repozados, sin belas.

   

 

Siz de yorumunuzu yapın

Tüm Yorumları Görün