Un nombre kontreversiyal de un kazal en la Amerika

Metin DELEVİ Judeo-Espanyol
23 Ekim 2020 Cuma

La kesha era ke este nombre semboliza el odyo i la intoleransya del rejim Nazi.

Kon kaminos estrechos kon asfalt bozdeyado, ke mos yevan a la sivdad de Black Brook en la montanya Adirondack, a unos 56 kilometros al sud de la frontyera entre Estados Unidos i Kanada se topa un kazaliko ke se yama Swastika ay mas de un siglo.

Los myembros del  konsilyo del kazal konsideraron un trokamyento de nombre despues de ke un vizitante de Nueva York deklaro ke era ofansivo i impertinente por la memorya de los veteranos de la Segunda Gerra Mundial enterrados en tombas en un kampo serkano. Michael Alcamo disho ke en pasando este enverano  kon su bisikleta  por esta zona remarko el kazal de Swastika.

"Me sorprendyo ke las personas ke biven aki no pensaron i toparon un nombre diferente despues de 1945, i afilu antes", disho Alcamo.

Los myembros del konsilyo se reunyeron el 14 de Septembre i refuzaron unanimemente un trokamyento de nombre.

“Lamentamos ke las personas, de afuera del kazal, ke mankan el konosimyento de la istorya de muestra komunidad se ofenden kuando ven el nombre”, eskrivyo el supervisor de Black Brook, Jon Douglass, en un korreo elektroniko. "Para los myembros de muestra komunidad, reprezentado por este konsilyo, es el nombre ke elijyeron sus ansestros".

El sembolo fue relasyonado a Adolf Hitler i su Partido Nazi desde la dekada de 1930, aunke los kroches  kon los brasos enkorvados en angulos de 90 grados fueron empleados en el arte durante miles de anyos antes del Olokosto, ande fueron matados 6 milyones de djudios i otros 5 milyones de non-djudios. El nombre de la sivdad provyene de la palavra sanskrita ke sinyifika "bien-estar".

Uno de los kuatro myembros del konsejo munisipal ke voto para mantener el nombre, Howard Aubin, disho al Adirondack Daily Enterprise ke "solo una persona intolerante" puede konsiderar ke el nombre esta relasyonado kon los nazis.

Un otro myembro del konsilyo, Douglass, disho ke el nombre provyene de los kolonos i imigrantes en el siglo XIX. El Press-Republican de Plattsburgh relato una istorya diferente en un artikulo de 1977 apoyandose a una sitasyon de un ex-direktor de postas dizyendo ke la komunidad rural era konosida komo Goodrich Mills, ma se empeso a yamar Swastika en 1913 despues ke este nombre aparesyo en la ofisina de posta lokal.

Douglass, ke no partisipo al voto, disho al National Public Radio NPR ke la djente aviya demandado de trokar el nombre munchas vezes antes i despues de la Segunda Gerra Mundial.

“I syertos de los rezidentes ke eran de esta area, en realidad lucharon en la Segunda Gierra Mundial i  refuzaron de trokar el nombre solo porke Hitler troko la sinyifikasyon de la Swastika”.

Alcamo disho ke fue deziluzyonado, ma pensa i espera ke la sivdad va rekonsiderar esta desizyon un diya o un otro.

En Avril de 2019, el Konsejo Munisipal de Cherry Hills Village en Colorado voto a la unanimidad para alevantar  el nombre "Swastika Acres" de una subdivizyon.

Devemos de saver ke en Ontario, Kanada tambyen, egziste un kazaliko ke se yama Swastika desde mas de 100 anyos.  

 Transladado i adaptado del Yeshiva World News de 25 Septembre 2020.

Siz de yorumunuzu yapın

Tüm Yorumları Görün