Dos semanas antes empesi a kontarvos sovre este diya ke organizamos kada anyo. Ma esta vez lo mas muncho por medio elektroniko; kon muestro sitio de internet. Mizmo no estamos organizando nada direktamente en el muzeo este diya por modo de la egzistensya de la Korona.
Ay dos tures ke vamos a realizar. El primer es “El Pasado Djudio de Galata”. Es muestro amigo, Mois Gabay ke lo va realizar. Ay muncho tyempo ke no realizamos un torno asemejante kon todas estas posibilidades. Lo mas muncho 30 personas van a pueder partisipar a este torno. El presyo es 175 liras turkas / sin komida. Kon esto vash a pueder vijitar i el Muzeo Djudio, las sinagogas Askenazi, Italyana i el Templo de los shastres, el Schneidertempel. El torno va empesar a las 11.00.
El mizmo diya por la primera vez, muestro amigo, Mois Gabay va organizar un segundo torno ke se esta realisando por la primera vez en Estambol. “Lo ke izieron ganar a Estambol los Kamondos”. Esto torno va empesar a las 16.00 i vamos a ver el Han de los Camondos, la kaza ande moravan, las eskaleras de los Kamondos i otros edifisyos. El torno va topar fin kon una presentasyon en el muzeo.
Kreo ke estos dos tures van atirar la atansion de los enteresados.
El mizmo diya las otras firmas ke organizan tures van a pueder vijitar los mizmos lugares.
El mizmo diya vamos a organizar un konsyerto de las Estreyikas d’Estanbol en la Sinagoga de Neve Şalom. İzzet Bana i las Estreyikas d’Estambol mos van a prezentar un konsyerto ande vamos a pueder konoser el muevo album ke fue publikado i ke tuvo un grande sukseso.
Los otras aktividades van a ser propajadas en el internet i lo mas va kedar un anyo entero en el sitio del Muzeo Djudio. Vamos a tener 10 programes diferentes sovre la Ley Djudia i las Tradisyones ke van a ser presentados por Yusuf Altıntaş. Moris Levi kon muestra direktrisa Nisya mos va prezentar un otro program. Vamos a tener un video sovre la Kozina Djudia Sefardi i mos vamos ambezar komo se deve gizar syertas komidas ; un video organisado por Renan Koen sovre el Holokosto. Vamos a ver una boda de los Djudios Sefaradis d’Estambol. Kale saver ke es una boda realizada por los artistos de siertas piyesas de teatro. Una avla sovre el Judeo-Espanyol. Un konsyerto sovre los kantes de las sinagogas kantadas por el grupo de Cako Taragano. Vamos a sintir syertas kantikas kantadas por Karen Gerşon Şarhon dandomos eksplikasyones sovre la muzika Sefardi. Vos invitamos a partisipar a este dia ermozo kon vuestros amigos non-judios.
Vos estamos asperando kon vuestros vizinos ke no son Djudios para ke tyenen la oportunidad de konoser los Djudios
