Fin de Enverano i el Turnesol

Silvyo OVADYA Judeo-Espanyol
2 Eylül 2020 Çarşamba

  A la fin del mez de agosto empesa el otonyo. Mos akodramos de esta sezon kon el empesijo de las eskolas. Ma kon esta Korona no reushimos mizmo de avrir las eskolas. Por esta razon estamos organizando un konserto en la plaj del Klub Anadolu en la Büyükada ande las Estreyikas d’Estambol van a dar un konserto. Despues del CD ke fue realizado esto es la sola okasyon para dar un konserto. En invyerno kreo ke no vamos a topar posibilidades para organizar konsertos. 

 Oy, diya de Lunes, dainda no tuvimos bastantes demandas para el konserto. Ma kreo ke la djente va dar karar el diya dalkavo. Muestro dover va ser de demandar Shabat i Alhad a la djente si son enteresados kon este konserto. No vos olvidesh. Esto pronto para enbiyarvos invitasyones ande keresh!

  En el titolo, eskrivi un segundo biervo. Lo mas muncho de los azetes en muestro payis por la primera vezfueron produsidos por syertos djudios. En Adana la Famiya Gilodo en 1925 empezaron la produksyon del azete de algodon (Si dishe algodon es las pipitas del algodon i esto se yama “çiğit” en turko). I eyos fueron los primeros a produsir este azete ke fue muy emportante para la industriya. Esto fue la raiz de la fabrika de Marsa ke es una de las mas emportantes fabrikas de margarina en muestro payis i ke apartene oy en diya al grupo Sabancı. 

  Vos kero avlar i del azete de susam ke se yama “Şırlayan Yağ” ke fue produsido por la primera vez en Edirne por los Malki’s en Bostanpazarı; i era vendido en Ağaçpazarı en el Bakkal de Sepetçiler. Ya savesh ke este azete se empleava para azer tahina. (Ya puedesh meldar esto en el livro de Oral Onur, en su livro sovre los Djudios de Edirne).

  Ma yo vos kero avlar sovre la azete de turnesol. En turko lo yamamos "ayçiçeği o gündöndü", porke el turnesol se engrandese mirando al sol. Un syerto tyempo disheron ke era el azete bueno para la salud. En muestra kaza, mi padre fue atakado por una kriza kardiaka en 1963, kuando tenia apenas 44 anyos. En esta epoka disheron ke no era bueno utilizar el azete de azetunas. I utilizimos a lo manko vente anyos solo el azete de turnesol en kaza. Despues los doktores disheron ke no era djusto; i ke era mas sano de utilizar la azete de azetunas. Tornaremos al azete de turnesol. No se konosiya en Turkiya i no se sembrava. Se empleava para apartar los terrenos. I era una planta de ornamento. Es en 1929 ke el Edirneli İsak Duenyas vido ke se esta produsiendo azete de esta planta en los Balkanes i dyo karar de azer la mizma koza en muestro payis. Komo era un merkader ke todos teniyan konfiyensya empesaron a sembrar el Turnesol kon el semyente ke les dyo el sinyor Duenyas. I les prometyo de merkar todo lo ke ivan sembrar. Despues tuvo relasyones kon un Ermeni de Estanbol, kon el Sinyor Melkon Aslaner ke izo la produksyon de las preses para obtener el azete del turnesol. I a la fin reusheron a kitar este produkto. Los kazalinos teniyan konfiensya en este merkader. Es por esto ke İsak Duenyas, el padre del famoso Mediko de las kriyaturas el Doktor Duenyas, granpapa de los dos İsak Duenyas ke konosko, fue el pionaryo de este ofisyo en muestro payis. Esto meldando esto todo en la gazeta “Günaydın"ke fue publikado 51 anyos antes; anyo ande el Turnesol izo ganar buen karar de paras a los ke lo sembraron. Oy en diya los 50% de los semyentes de azete en Turkiya es el Turnesol. Se sembra en 681.000 hektares i tenemos una produksyon de 1800.000 tonas al anyo. Ya vesh komo es emportante un ombre ke tyene inisyativa.

 

Siz de yorumunuzu yapın

Tüm Yorumları Görün