El Djugeton de Elia Karmona

Judeo-Espanyol
28 Temmuz 2020 Salı

Nesi Altaras


Durante la klasa de Ladino de la Universidad de Washington (dirijida por Prof. David Bunis) meldimos munchas kozas para pratikar la lingua, ma mis favoritos vinieron de una gazeta de Estambul ke se yamava "El Djugeton". El autor, Elia Karmona, la establesio en 1908, despues de la revolusyon de los Turkos Mansevos. Los Djudyos del Imperio en jeneral, i los djudyos entelektuales de Estambul en partikular fueron segidores entusiastos de este trokamiento i profitaron muncho del aire de liberasyon. Esta epoka fue fundamental en la suvida rapida de la prensa djudiya, la mayoria en Ladino ama tambien en fransez.

La publikasyon de Karmona se izo famoza porke El Djugeton kontinuo la tradisyon rika del umor en Ladino. En muestro folklor, istorias de Djoha fueron el elemento umorozo sentral ma en los dias de la revolusyon, Karmona los kazo el umor i las demandas de modernizasyon. En un artikolo de 1913, el se burlo de las kreensias absurdas de los djudios de Estambul komo el gursuzluk del numero tredje o del ojo malo. De este modo, el izo una yamada para abandonar estas superstisiones i en mizmo tiempo, konservo estas kreensias para mozotros. El adaptava istorias de Djoha i mostrava los problemes de los proves aryentro la komunita djudia. Muestra lingua mos desha munchas oportunidades de djugar kon biervos i una razon es ke el Ladino tiene mas de una manera para eksprerar la mizma idea porke ay biervos de orijines diferentes (Espanyol, Ebreo, Turko, Fransez, Grego i otros) por algunas kozas. Indemas, Karmona aprovechava de biervos komo ‘kurto’ ke uzamos i por el tiempo i por la largor: en una konsejika sovre el berber Bohoriko ke avlava muncho durante su lavoro, su mushteri le demanda ke lo aga kurto (su avla) ama el berber pensa ke kere ke le korte los kaveyos muy kurtos!

El estilo i shakas de Karmona fueron kontroversiyal. Sus kritikos del Bet Din i los sufus kavzaron ke el Hahambashi Haim Nahum avra un proseso judisial kontra el. Ma, komo Olga Boroyava eksplika en su livro sovre la prensa en Ladino, este proseso izo El Djugeton mas famozo en su empesijo.

Malorozamente, los anyos de la Republika fueron muy difisil para la prensa en Ladino. El Turko se izo la lingua mas komun mizmo entre los djudios i el pezgo de las sensuras fueron demasiado por munchas gazetas. El Djugeton fue uno de los dalkavos egzemplos de la eksplozyon de la prensa djudia despues de 1908. Se serro en 1931. La prensa djudia en Turkiya bivio una segunda ola en los anyos 40 ama no tuvimos mas una publikasyon solamente satirika komo El Djugeton de Elia Karmona.


Siz de yorumunuzu yapın

Tüm Yorumları Görün