Mi sonyo de re-admirar el Bosfor de Ortaköy delantre de: ORTAKÖY CAMİİ

La re-avyertura de las meshkitas en Turkiya, me izo pensar al simbolo situado al bodre del Bosfor: Ortakoy Camii.

Esti SAUL Judeo-Espanyol
10 Haziran 2020 Çarşamba

"Si la pandemiya fue una koza ke no puediamos imajinar, espero ke se va realizar mi sonyo de redeskuvrir un dia el Bosfor, en un torno a Ortaköy...

Asentarmos mizmo kon maska, en un banko delantre de la mar MARMARA, admirar la meshkita maraviyoza, monumento importante de arshitektura de Estambol sera un grande keyf...

Ke luzyor sera de ver baylar i saltar los delfinos independentemente, sin ser deranjados en sus areas. Estaran rengrasiandomos solikos, kon los suyos...

Konosida komo ORTAKÖY CAMİİ, la meshkita se yama BÜYÜK MECİDİYE CAMİİ (the Great Medjidiye Mosque).

Toma su nombre del Sultan Abdülmecit ke la izo konstruir en el estilo Neo-Barok, en 1853, por el arshitekto NİGOĞOS BALYAN, uno de los mas reputados arshitektos del siglo 19.

Es una de las maraviyas al bodre del Bosfor. Las inskripsiones kaligrafikas fueron egzekutidas por el Sultan. Las restorasiones se realizaron kon la kontribusion de la “Fondasion Gürsoy" antes anyos. El projekto sientifiko fue egzekutido metikulozamente por los arshitekos spesialistos i Nilgün Olgun, la administradora de la Fondasion.

No puedemos olvidarmos de Desembre 2015, este lugar ande selebrimos por la primera vez la fiesta de HANUKA, kon la partisipasion de la Munisipalidad. Aviyamos asendido la Hanukiya por la primera vez en Estambol, Turkiya.

 

KERIDOS LEKTORES,

LA LUZ VA AMANESER DE LA OSKURIDAD...

AMISTADES.

 

Siz de yorumunuzu yapın

Tüm Yorumları Görün