Muestro amigo Metin Delevi se okupa sovre todo modo de sujetos konsernando el Olokosto i es miembro de un Komite ofisial sovre el Olokosto. El mos embiya todo modo de haberes, i mos enforma sovre las reunyones, las konferensias i las komemorasyones ke se realisan en este kampo. Este anyo para la komemorasyon de la Shoa la komunidad Djudia de Fransia (CRIF) kon el Memorial de la Shoa organizaron una seremonia de komemorasion en el ZOOM. No se si empesatesh a azer reunyones asemejantes ma a mi no me esta plazyendo. No me plazen munchos bezos i abrasos ma kero ver la djente; kon ken estamos. No esto avlando de este anyo. Ma esto avlando por los anyos ke vyenen.
Kuando los Djudios Fransezes avrieron en 1998 el Muzeo de arte i de istorya del Djudaizmo en Paris troki mismo la data ke me devia de ir me a Paris para pueder vijitar lo mas temprano posivle este muzeo ke devia de ser muy enteresante. Sin olvidar vos kero dizir ke este Muzeo fue formado por el Ministerio de la Kultura i no por la Komunidad Djudia de Fransia. Los Djudios fransezes son la mas grande komunidad Djudia de la Evropa. Esta komunidad se engrandesyo i se enfortesyo despues ke los Djudios de los payises del norte de la Afrika vinyeron en estas tyerras. Estavan ambyertos a la demokrasiya i la toparon aya. Ya savemos ke kon la proposisyon del famozo ministro de la Djustisia Adolphe Cremieux kon la ley del 1870, izo fransezes a todos los Djudios de la Algeria. Despues de la libertad de la Algeria entre 600.000 personas vinyeron de la Algeria a la Fransya, los 110.00 entre los 120.000 Djudios Algerianos vinyeron a las tyerras fransezas. I este modo la Komunidad Djudia de Fransia se enfortesio kon los ke vinieron de los payises del norte de la Afrika. Ya savemos ke buen karar de Marokanos i Tunisyanos alkansaron a la Fransia en la mizma epoka.
Kuando vijiti el Muzeo en Paris el mizmo anyo ke se avriyo, veygo ke no ay nada sovre la epoka de la Segunda Gerra Mondial, sovre el Olokosto, sovre lo ke bivyeron los Djudios Fransezes komo mi madre ke era Franseza i bivia en Paris. Ya puedesh ver la fotografia de la estrea (Magen David) ke fue ovligada de portar ensima de su korason. Fue mazaloza kon su ermano i kon sus paryentes de no ser deportados. Ma no bivyeron en Paris toda esta epoka. A la fin estava eskrito ke todo esto iva ser el sujeto de un otro muzeo. De mi para mi dishe izyeron un echo a la turka. No metyeron lo ke kalia. Esto era mi penserio ke no era djusto porke estavan aparejando “El Memorial de la Shoah” ke avrio sus puertas en 2005.
En su pared se topa una mapa mostrando los kaminos de los trenes ke transportaron milyones de Djudios de muncho payizes a la Polonya a Auschwitz i otros kampos de eksterminasion. Ma kuando egzaminash este mapa, vash a ver ke dize ke el treno empesa su kamino por la Turkiya. Empesa su kamino por Nea Orestea (Yeni Karaağaç) ma este kazal no se topa en Turkiya; se topa en Gresia. Un Muzeo tan importante no tyene el derecho de meter dokumentos ke no son djustos i ke no reflektan la verda. Kero publikar este artikolo en el sitio “Ladinokomunidad” para ke muestros amigos Fransezes tengan la posibilidad de ver esta karta jeografika.
Seslendiren: Karen Gerson Şarhon
