Kenan Cruz Çİllİ
Keridos meldadores, oy va eskrivir sovre tres kales istorikos en la maale de Balat ke esto investigando. Malorozamente uno de estos kales no egziste mas, i los otros dos estan en kondisyon muy terrivle. Ama grasias al Dio, aun ay muncha djente ke deve tener memorias de estos kales de los diyas kuando estavan avyertos. Entonses yo kero topar a estas personas i arekojer sus memorias i sus istorias para despues djuntarlos en uno solo livro de memorias i rekuerdos. Yo penso ke es muy importante realizar uno proyekto ansina para prezervar la memoria de estos lugares. I tambien para ke las jenerasyones futuras puedan ambezarsen mas sovre la istoria multikultural de Estambol. Komo vesh en la foto, ay tres kales ke kero empesar a investigar en primero. El Kal de Unkapanı, El Kal de Eliyahu, i el Kal de Selaniko.
1. El Kal de Unkapanı se topava muy serka del Kuerno de Oro, en la maale de Unkapanı. Meldi en un artikolo ke era posivle yegar a este kal kon barka i ke mirado de la agua paresiya a un yali ermozo. Tambien meldi ke esta sinagoga era muy muy istorika ama ke fue demolida en el anyo 1985 por la munisipalidad en un proyekto para “organizar” la zona serka del Kuerno de Oro. Kuando yo oygo la palavra Unkapan, me akodro de la kantika Bre Sarika Bre, i solo imajino ke antiguamente los primeros a kantar esta kantika tradisyonal sefaradi talvez pasavan por este kal.
2. El Kal de Eliyahu fue un lugar ke topi por koinsidensiya la ultima vez ke fui a Balat. Estava kaminando i vide la plaka chikitika eskrita en evreo. La data en la plaka ke vesh en la foto es 5656 (1895/6). I en unas informasyones ke topi en bushkando en el internet vide ke el edifisyo agora se esta uzando komo una tienda. No se kuando el kal serro sus puertas a la keila.
3. Finalmente, la tresera sinagoga es el Kal de Selaniko. Meldi ke este kal era uno de los mayores i mas famozos en Balat. Su nombre mos mostra ke la djente ke konstruyo la sinagoga yego de la sivdad de Salonik ande aviya una komunidad djudia muy grande. Esta sinagoga ke es muy istorika fue abandonada en el anyo 1975 despues ke kayo su techo. Agora solo se topan sus kuatro paredes.
Entonses, agora va demandar a vosotros meldadores. Si tenesh alguna memoria, algunas fotos, o alguna istoria personal, grande o chika, sovre estos kales, me plazeriya muncho entrevistarvos para enrejistrarlos. Mi eshuenyo grande es para un diya konvertir este proyekto en un livriko, i para konservar estas istorias. Empesi por estos tres kales, ama si keresh ser entrevistados sovre algun otro, o tenesh memorias ke keresh partajar, klaro ke seran mas ke bienvenidos. Me puedesh kontaktar en turko o ladino por email: [email protected] o por whatsapp +31629398473. Grasyas!
Seslendiren: Karen Gerson Şarhon
