El buto del Dia Internasyonal de la Mujer es travar la atansyon sovre los problemas sosyales, politikos, ekonomikos i kulturales ke afrontan las mujeres, i sostener el adelantamyento de los derechos de las mujeres en todos estos sujetos. Komo dizen los organizadores de la selebrasyon, “kon una kolaborasyon seryoza, podemos ayudar a las mujeres a avansar i liberar el potansyel illimitado ke pueden adjustar a las ekonomiyas de todo el mundo”. Este dia, de otra parte, se uza para akodrar las mujeres ke izyeron kontribusyones sinyifikativas para avansar la umanidad i los derechos de las mujeres tambyen.
La primera selebrasyon del Dia de la Mujer, yamada akel tyempo “Dia Nasyonal de la Mujer”, se izo el 28 de Febrero de 1909, en la sivdad de Nueva York, organizada por el Partido Sosyalista de Amerika propozado por la aktivista Theresa Malkiel, komo se entyende de la alkunya, una Djudia.
El Dia Internasyonal de la Mujer se selebro por primera vez el 19 de Marzo (no el 8 de Marzo), en 1911. Un milyon de mujeres i ombres manifestaron en apoyo de los derechos de las mujeres en este primer Dia Internasyonal de la Mujer enspirado del Dia Nasyonal de la Mujer de los Estados Unidos.
Al anyo venido, la Internasyonal Sosyalista se reunyo en Danimarka i los delegados akseptaron la idea del Dia Internasyonal de la Mujer. La idea era avansada de la parte de Rosa Luxembourg i Klara Zetkin, delegadas djudias de la Alemanya. I ansi, al anyo sigiente, el primer Dia Internasyonal de la Mujer, o egzaktamente Dia Internasyonal de la Mujer Lavorante, se selebro kon manifestasyones en Danimarka, Alemanya, Suisa i Austria.
No paso una semana del primer Dia Internasyonal de la Mujer, el fuego de la fabrika Triangle Shirtwaist Factory mato a 146 personas, en su mayoria mujeres imigrantes djudiyas mansevas, en la sivdad de Nueva York. Este insidente inspiro munchos trokamyentos en las kondisyones del lavoro endustrial, i la memorya de los ke muryeron fueron rekodrado komo parte de los Dias Internasyonales de la Mujer desde este evento.
Espesiyalmente en los primeros anyos, el Dia Internasyonal de la Mujer estuvo relasyonado kon los derechos de las mujeres lavorantes.
Despues del primer Dia Internasyonal de la Mujer,
• La primera selebrasyon Rusa del Dia fue en Febrero de 1913.
• En 1914, antes del empesijo de la Primera Guerra Mundial, el 8 de Marzo fue un dia de manifestasyones de mujeres kontra la gerra.
• En 1917, el 8 de Marzo, las mujeres rusas organizaron una grev, ke fue el empesijo de los eventos ke rezulto en el derrokamyento del Tzar.
La fiesta fue espesyalmente popular durante munchos anyos en la Europa del Este i la Union Sovietika. Poko a poko, se troko en una selebrasyon verdaderamente Internasyonal.
Las Nasyones Unidas selebraron el Anyo Internasyonal de la Mujer en 1975, i en 1977. Eyos deklararon ofisyalmente el rekonosimyento anual de los derechos de las mujeres, konosido komo el Dia Internasyonal de la Mujer.
En 2017 en los Estados Unidos, munchas mujeres selebraron el Dia Internasyonal de la Mujer tomando el dia libre, komo un “Dia sin Mujeres”. Se serraron eskolas kompletamente (las mujeres en los Estados Unidos reprezentan aproksimadamente el 75% de los maestros de eskolas publikas) en syertas sivdades. Los ke no pudyeron tomar el dia libre se vistyeron en kolorado para onorar el espirito de la grev.
