A la onor de Hanuka ke estamos fyestando: La Istorya de Hanuka

Metin DELEVİ Judeo-Espanyol
25 Aralık 2019 Çarşamba

Aldoredor del anyo 167 A.C. los governadores sirio-gregos de Judea provaron a ovligar a los djudios a asimilarsen a la kultura elenika. Yamaron a los djudios a las plazas de la sivdad ande los ovligaron a adorar los idolos gregos o sakrifikar un puerko delantre del ídolo.

Kuando los soldados sirio-gregos egzijaron ke los djudios de Modi’in sakrifiken un puerko a uno de sus idolos, Mattatiyahu, un haham de la famiya de Hasmonaim, refuzo de permitir ke esta profanasyon akonteska i mato al djudio ke se aviya portado volontaryo para azer este sakrifisyo. Mattatiyahu, djunto kon sus ijos, tambyen atako a los soldados sirio-gregos. Ganaron esta batalya, ma fueron ovligados de refujyarsen en las kolinas. Los ijos de Mattatiyahu fueron konosidos komo los Makabeos.

Basho la dirijensya de Yuda el Makabeo, los djudios empesaron una gerra de gerillas por la libertad. En 165 A.C. los Makabeos finalmente reusheron a venser las fuersas sirio-gregas muy superiores en soldados i instrumentos de gerra i tomaron atras el Templo, ma entre mientes, los gregos-sirios aviyan profanado kompletamente este lugar Santo. Los djudios se metyeron imediatamente a lavorar para eliminar los idolos, fraguar el altar i realizar los lavoros nesesaryos para pueder rededikar el Templo.

Ma malorozamente, no aviya kedado azete pura i kasher para ensender la Menorah de oro. Los djudios bushkaron tinajas serradas de azete puro, i finalmente toparon solo un bokal chiko  kon su estampa de pureza. Se alegraron i koryeron para ensender la Menorah i tornar a sus lavoros en el Templo.

Ma el bokal de azete ke toparon era sufizyente para un diya solo. Se teniya menester a lo manko otra una semana para aparejar i entregar azete de olivo puro i fresko. No kijeron posponar la realizasyon de la mitzva i desidyeron de ensender la Menorah kon lo ke teniyan, i asistyeron al milagro de Hanuka. Malgrado la chika kantidad de azete, la Menorah kedo ensendida durante los ocho dias kompletos, lo ke indiko al mundo ke la prezeensya del Dio aviya tornado al Templo i a su puevlo.

 

 

 

 

Siz de yorumunuzu yapın

Tüm Yorumları Görün