Konoseremos a las reynas de ermozura djudias de la India

Metin DELEVİ Judeo-Espanyol
15 Mayıs 2019 Çarşamba

Kuando se izo la  primera kompetisyon de ermozura Miss India en 1947, no fue una sorpreza kuando gano una impresionante estreya de Bollywood (el Hollywood de la India) ke se yamava Pramila. Era una ermoza natural, kon ojos grandes, pretos i briyantes i una sonriza kayente komo el sol de la India. Eya tambien era una djudia de Bagdad, nasida kon el nombre Esther Victoria Abraham.

Los djudios syempre fueron una minorita relijyoza en la India: aktualmente kaji son unos 5,000 sovre una povlasyon total de la India ke es de 1.3 milyardas.  Ma kuando Pramila aksepto el titolo de Miss India teniya 31 anyos i estava prenyada de su sinkena kriyatura. Eya avriyo un kamino para las futuras Miss India djudias, empesando kon su propya ija, Naqi Jahan. Jahan fue koronada komo Miss India vente anyos despues de su madre i fue la primera muchacha de India i de mas djudia, a representar la India en la kompetisyon de ermozura afuera del pais,  Queen of the Pacific Quest de Australia.

Afuera de la famiya de Pramila, aviya munchas otras ermozas mujeres djudias kandidatas para asumar este titolo. Un poko mas de dyez anyos despues, en 1959, una modela indiana djudia ke se yamava Fleur Ezekiel fue koronada Miss India i represento la India en Miss Mundo 1959 en Londra en la sala Lyceum de balos. En esta kompetisyon de Miss World aviya otruna djudia, Ziva Shomrat, Miss Israel ke fue tresera en esta kompetisyon de Miss world. I una anekdota sovre esta kompetisyon Miss World 1959.  Verso la fin de la kompetisyon, unas kuantas oras antes del anunsyo de los rezultados, Corine Rottschäfer, reprezantando la Ollanda, deskuvryo burakos en su fostan de noche. Miss Israel, Ziva Shomrat tuvo la amabilidad de emprestarle un fostan de noche, i a la fin Corine fue la primera i Miss Israel se izo tresera en la kompetisyon.  Si tornamos a Fleur Ezekiel, Fleur era myembro del distrito Bene Israel, ke siempre fue la komunidad djudia la mas grande de la India.

En mas serka, en 1972, Salome Aaron fue onorada komo Miss India. Salome Aaron es una balerina profesyonel partisipando a los konkorsos de bayle i koreografa de sinema en Bollywood. Su madre i padre, Sam i Ruby Aaron, son konosidos komo djudios buenos ke izyeron konoser i azer adelantar el arte de la samba en la India.

Si kere el Dyo, vos va da haber kuando la kuatrena Djudia va tomar el titolo de Miss India!

 

 

Siz de yorumunuzu yapın

Tüm Yorumları Görün