La korona de la Vale de Jezreel en Israel

Metin DELEVİ Judeo-Espanyol
17 Nisan 2019 Çarşamba

Oy en dia, la sivdad de Afula, kon una populasyon de 49,000 abitantes, se ve komo la korona i la kapital virtual de la Vale de Jezreel en el sentro-norte de Israel. Munchos identifikan la Afula de oy en dia kon la sivdad de Ofel mensyonada en la Tora, el lugar del djuzgador Gideon (Shofetim; 6-8) i en relasyon kon el profeta Elisha, ke se enkontra en la Tora en los Reyes II (Melahim II 5:24). Las ekskavasyones en la Afula de muestro tyempo indikan la prezensiya kontinual en Ofel desde la epoka kuando los ebreos lo abitaron en los tyempos bíblikos asta oy. Una lista de la populasyon de 1887 indika ke 630 abitantes musulmanos biviyan en “El Afuleh”. Sovre las informasyones de 1900, kuando se estava fraguando el shemendifer de la Vale de Jezreel, Afula, mos estamos ambezando ke aviya 50-55 kulibas kon solo 20 abitantes.

Despues del retorno de los djudios a la Palestina antes de la kreasyon del estado de Israel, en el empesijo del siglo XX, Yehoshua Hankin en primero merko 10 kilometros kare (10,000 dunams) de tierra en Al-Fuleh, ande se fraguaron dos Moshavim, Merchavia i Tel Adashim. Durante la Primera Gerra Mundial, la 4na Division de Kavalyeros en el Desierto del jeneral britaniko, Edmund Allenby kapturo Afula de los turkos otomanos durante el kombate de Sharon en Septembre de 1918. En los senso britaniko de 1922 salyeron 563 habitantes en Afula, en su mayoria musulmanos, i unas kuantas dozenas de kristiyanos (62), djudios (28) i 2 bahai.

La moderna sivdad de Afula se fundyo en el 31 de Marso de 1925, ke koresponde al 6 de Nissan a la djudiya, kuando la Commonwealth sionista de los Estados Unidos merko la vale de Afula de la famiya Sursuk de Beirut. Kaji un kuarto de las famiyas arabos akseptaron una kompensasyon por sus tierras i se fueron voluntariamente. El resto fueron deslokados. Los djudios empesaron a arivar a estas tierras en grande nombre i el desvelopamyento kontinuyo. En 1931, la populasyon arivo a 874 almas, 786 de eyos eran dudios. En 1945, Afula se engrandesyo a 18,277 dunames i su populasyon de djudios kresyo a 2,300 kon solo 10 musulmanes.

Afula fue un punto de akseso peligrozo, achakes de su proksimidad a los kazales arabos de Nablus (Schechem en la Tora) i Jenin. Las milisyas djudias en 1945, 1946 i un poko antes de la gerra de 1948, sabotearon los rayes i los kaminos de treno, impidyendo los viajes de Nablus i Jenin a Afula. Solo en 2011 se restoraron los kaminos de treno ke konektan Haifa a Beit She’ean, kon una istasyon en Afula. Los pasajeros pudiyeron realizar el viaje en este traje solo en el empesijo de Oktubre de 2016. Antes de esta data afitaron unos kuantos atakos en Afula, i los fuzes de Hezbollah lo chafteyaron dos vezes en Julio de 2006, durante la gerra entre Israel i Hezbollah.

El djigante israeli del ayre kondisyonado, Tadiran, tiene su baza de fabrikasyon en Afula, komo los fabrikantes grandes de plastik Keter Plastic i StarPlast. HaEmek Medical Center fue el primer hospital rejyonal en el pais i kontinuya a sirvir el puevlo de Afula i los doredores. Afula tambien es la sivdad natal de un equipo profesiyonel de basketball i futbol ke djugan en las ligas de Israel.

 

Siz de yorumunuzu yapın

Tüm Yorumları Görün