Investigadores israelyanos toparon una forma mueva de guadrar o azer dezapareser sinyos de vejez!!!
Un ekipo de investigadores en la Universidad Bar-Ilan de Israel desveloparon una forma innovadora para kombatir las rugas i otros sinyos de vejez sin el uzo de enjeksyones. El ekipo de investigadores krearon una krema ke kontyene molekulas chikos de polimeros de asido hialuronikoo (HA), ke ayudan a kombatir los sinyos de vejez.
El proyekto de investigasyon fue patronado por la kompaniya de kozmetika israeli Hava Zingboim Ltd. Dos profesores de los departamentos de kimika i fizika de la universidad i del Instituto de Nanoteknolojiya i Materiales Avansados, Rachel Lubart i Aharon Gedanken, prezidaron el ekipo de investigasyon.
Durante los ultimos 20 anyos, la HA fue utilizado en tratamiyentos anti-vejez bazados en forma de enjeksyon en todo el mundo. Kuando los polimeros de HA se enjektan en el kuero, absorban los likidos i notralizan las toksinas, por mo de esto, las rugas trokan de forma i el kuero se ve mas mansevo i fresko.
I de mas, el puerpo umano naturalmente produiza molekulas de HA, ma kuando una persona toma anyos, la kantidad de estas molekulas ke el puerpo produiza empesa a apokarse. Esto es la razon ke una persona parese vyejo o vyeja. Las molekulas de HA son bastante grandes i, por mo de esto siempre se nesesito injektarlos para ke penetren al kuero i al puerpo.
Es aki ke empeso la savidurya i la orijinalidad de los investigadores. El ekipo israeli pudo enchikeser de una manera simple i presto redusiendo los polimeros de HA, un proseso ke antes era o se pensava ser karo i avagar. Se espera ke la mueva krema israelyana va ramplasar el uzo de las enjeksyones sovre las karas en la endustriya de anti-edad.
“En todo el mundo, [las personas] estan tratando de mikronizar / enchikeser el asido hialuroniko para uzarlo komo krema para ke se tope una alternativa a las enjeksyones”, disho Lubart. “Ma en este momento, no konosemos institusyones o personas ke disheron reushir en este proseso i puedemos dizir ke somos los primeros a poder dizir ke reushimos”.
Ke dizir, otro tanto para los ombres!
