Punto de entrada a los Estados Unidos: Ellis Island

Metin DELEVİ Judeo-Espanyol
6 Mart 2019 Çarşamba

La otra noche vide un dokumentaryo sovre Ellis Island i los djudios. Kije eskrivir sovre este lugar muy importante para los djudios.

Aunke los imigrantes de todo el mundo yegaron a Ellis Island, la istasyon de imigrasyon en el porto de Nueva York tuvo un impakto diferente i importante enriva de los djudios i en sus istorya en los Estados Unidos. El 1 de Enero es el aniversaryo de la avyertura de Ellis Island komo sentro de imigrasyon.

A Ellis Island se dyo el nombre de Samuel Ellis, el ombre ke fue el ultimo proprietaryo de la isla antes ke fuera merkado por el governo de los Estados Unidos en 1808. Ma, kuando el governo merko la isla, kedo abandonado un tyempo muy largo, kaji 80 anyos. El ministeryo de defensa kontrolo la isla asta 1890, kuando fue desinyado para servir komo una istasyon de kontrol de la imigrasyon.

Los preparativos de la Isla Ellis para su muevo rolo nesesito un engrandesimyento de la isla por el governo, i esto se izo en inchendo la mar. Se fraguo un ermozo edifisyo en el stilo georgiano i el primer imigrante (i unas kuantas oras despues arivaron mas de 700 imigrantes) fue resivido el 1 de Enero de 1892. Ma, en Junyo de 1897, un fuego destruyo todos los edifisyos de tavla de la isla; grasyas al Dyo, no uvo peryita de almas. El muevo komplekso de tuvla se inoguro en Disiembre de 1900, i oy en diya egziste.

Yegar a Ellis Island fue una ekperiensya grandioza, emosyonante i de espantar para munchos de los imigrantes, i la mayoria de eyos no avlavan ni meldavan el inglez. Se egzaminavan los imigrantes por kualkyer problema de salud i en munchos kavzos las famiyas o konosidos ke esperavan ver no veniyan a resivirlos. Para los imigrantes djudios, un ayudo i apoyo empeso a vinir kon el establesimyento de la Sociedad de Ayudo para los Imigrantes Hebreos (HIAS- Hebrew Immigrant Aid Society) en 1902, ke empeso a embiyar reprezentantes para ayudar a los muevos arivantes. En 1911, se le permityo a HIAS de avrir una kozina kasher en la Isla Ellis, ke fue partikularmente provechozo para los imigrantes djudios ortodoksos.

Las politikas izolasyonistas ke empesaron despues de la Primera Gerra Mundial limitaron el shifro de imigrantes ke arivaron a la isla. Durante la Segunda Guerra Mundial, parte de la Isla Ellis fue utilizada komo un sentro de detensyon para los enimigos o de los ke se sospechava ser espiones o lavorando por los almanes. El servisyo de imigrasyon en Ellis Island fue serrada despues de 1954. Oy en diya se puede vijitar Ellis Island ke se troko en un muzeo de la imigrasion. I puedesh topar konosidos turkanos en los rejistros ke se pueden konsultar.

 

 

 

 

Siz de yorumunuzu yapın

Tüm Yorumları Görün