Sami Kohen Resivio un Premio de “Global İlişkiler Forumu” “Asosiasion de Relasiones Globales”

No tuve la oportunidad, frekuentamente, de pueder azer un reportaje en Judeo-Espanyol kon un profesional reputado del jurnalismo. Puedes darmos una idea de la asosiasion?

Esti SAUL Judeo-Espanyol
27 Şubat 2019 Çarşamba

Es una importante asosiasion donde los miembros son por la grande parte endustrialistos, komersantes, ministros i burokrates, donde unos de Ankara. Por egzemplo: İlter Türkmen, Hikmet Çetin i Yaşar Yakış son los miembros aktivos de esta Asosiasion.

RAHMİ KOÇ es el fondador de esta Asosiasion i munchas otras.

Su prinsipal buto es de kontribuar entelektualmente a la vida kultural, ekonomika i politika... Organizar konferensias kon la partisipasion de personajes Turkos i estranjeros. Redijar raportos sovre sujetos aktuales ke se distribuen a los dirijentes de muestro pais...

Egzemplo: Yo partisipi al raporto sovre las relasiones entre Los Estados Unidos i la Turkiya, ke fue prezentado a las otoridades de muestro pais, ansi ke a los E.U.

Los sentimientos ke sintites de resivir este premio onorable?

En mi kariera de jurnalisto yo resivi premios por mis reportajes i artikolos...

Pero este premio fue mas diferente. La Asosiasion organizo una seremonia en el otel Divan, Taksim. Lo ke fue para mi grande sorpreza.

Se prezento un video sovre mis aktividades i kuatro oratores tomaron la palavra para prezentar mis kontribusiones.

El ambasador Özdem Sanberk, en su prezentasion, se konsentro en mis artikolos sovre la diplomasia Turka i las relasiones kon paizes estranjeros...

El eskrivano Altan Öymen, mi kolega del diario “Hürriyet” dio un kuento rendido de mis servisios de 65 anyos a la prensa Turka...

Naturalmente estos elojios fueron un sujeto de orgolio personal para mi i tambien para muestra kolektividad.

Desde anyos la organizasion distribue premios?

El fakto ke el anyo pasado esta mizma onor fue dada al ex-Ministro Eksterior İlter Türkmen, fue una indikasion de la apresiasion de la Organizasion.

Kuando fue fondado, Sami?

Antes diez anyos, i ay dos anyos ke se distribuen premios de onor.

Ke plazer de azer este reportaje en la lingua de muestros padres!

Es realmente un plazer i una okazion ke no tenemos en muestra vida kotidiana.

Yo pasi mi chikez en una atmosfera ande se avlava el Ladino/Judeo-Espanyol. Mi padre lo avlava i lo eskrivia perfektamente en la revista ke el mizmo publiko en los anyos 1939—1949 (LA BOZ DE TURKİYA).

El era invitado i dava konferensias en ladino en diversas rejiones de Turkiya – Adana, Çanakkale, Gelibolu, Edirne, ets.

De manera ke yo tambien me ambezi el Judeo-Espanyol, ma no lo avli en los anyos de despues.

Muestro kerido amigo Sami Kohen. Un grande rengrasio por kontinuar a servir el pais i onorar muestra komunita kon tu simplisidad natural...

Te felisitamos por tus esforsos i te suetamos munchos otros premios.

 

Siz de yorumunuzu yapın

Tüm Yorumları Görün