Los Ke No Vinyeron Peryeron!

Karen GERSON ŞARHON Judeo-Espanyol
13 Şubat 2019 Çarşamba

Ya vos dishe la semana pasada ke si no vinish al Dia del Ladino/Judeo-Espanyol el 10 de Febrero, lo vash a regretar, i regretar de verdad muy muncho! Tuve razon. Los ke vinyeron estuvieron kon las rizas en las karas el dia entero. Komieron, bevieron, se englenaron i todos ama todos estuvieron muy muy kontentes. Todo estava de riyir, todo estava de achilar los korasones. Tanto se riyeron ke fue komo ke komieron 5 bonfiles! Por la primera vez no uvo ni una kesha i esto es una koza ekstraordinarya! Vinieron serka de 400 personas i no tener ni una kesha de tantos judyos es una maraviya.

Todo estava bueno. Los konferensiantes, uno mijor de otro. François Azar de Paris mos avlo de livros i kuentos. Prof. Marie Christine Varol (INALCO) mos avlo de sus eksperiensias kon su eshuegra. Yuri Sasson de La Kaza Muestra (Malaga, Espanya) avlo de sus proyektos en Espanya.

Muestras amigas ekstraordinarias, Süzet Herman, Şeli Gaon i Anna Eskenazi izieron una maraviya de parodias sovre “Milizina i Salud”. I muestros dos mansevos, freskos freskos, Selin Toledo i Can Rodrig izieron un chiko skech avlando del orijin de las palavras “narandja” i “portokal” ke estava muy muy interesante.

Ama, esto lo puedo dizir de siguro, la estreya del dia fue la piesa de teatro “Los Machukados”. Apenas salimos a la shena, ke la asistensia empeso a riyir i no se kedaron asta ke se eskapo 40 minutos despues. De verdad, todos estamos muy orgulyozos de aver kitado la piesa en 2 mezes, koza ke no es kolay. Kero felisitar aki de korason, la eskritora de la piesa, Forti Barokas, el rejisor, Ferit Kohen i todos los aktores ke sakrifikaron sus tiempo para vinir a las provas despues de la kanserya de kada dia. Mersi amigos por este dia maraviyozo!

La dalkavo estreya del dia fue el konsierto solo en lingua espanyola de Cenk Rofe, ke kanto i ke avlo en Espanyol i Judeo-Espanyol. Fue una maraviya de ver a los mansevos en la shena i fuera de la shena. Cenk, kon su boz maraviyoza i su manera simpatika gano los korasones de todos. Se eskapo el dia kon muncha alegria. Para kada anyo ke mos yege el Dio de organizar ermozuras.

Un grande mersi a Silvyo Ovadya, i a todos los miembros del Sentro Sefaradi ke lavoraron de alma i de korason para vender bilyetos, ankesar moneda (ke siempre es muy difisil kon los judyos), i resivirlos en la puerta. Mersi muncho a Emel Benbasat, Henri Çiprut, Anet Pase, Şeli Gaon, Süzet Herman, Dora Niyego, Dora Treves, Esti Saul, Korin Penso, Anna Eskenazi, Verjel İşman i Alberto Modiano, ke travo las fotos. Un otro mersi a Meir Robelyu por las komidas i borekas i biskochos, i otruno a Ömer Vurmaz, Kerem Aysel i todo el ekipo de la eskola Ulus por sus ayuda. I no mos olvidaremos de Pixus ke travo el dia entero al video i ke mos aparejara el DVD de este dia en pronto.

Siz de yorumunuzu yapın

Tüm Yorumları Görün

İLGİLİ HABERLER

İLGİNİZİ ÇEKEBİLİR