KONOSEREMOS UNA SİVDAD: En una sivdad sudamericana...

Metin DELEVİ Judeo-Espanyol
6 Şubat 2019 Çarşamba

El 18 de Enero de 1535, la sivdad de Lima, Peru, fue fundada para servir komo la kapital del governador del Peru.  Las rikezas minerales de la rejyon travaron, entre otros, a un grande nombre de kripto djudios (konversos, djudios ke biviyan komo kristianos en publiko) ke bivyeron en relativa paz i trankilidad asta el 9 de Enero de 1570, ke koresponde al 3 de Shevat a la djudiya, kuando el rey Felipe II de Espanya ordeno el establesimyento de la Enkizisyon  en Lima.

La istorya de los djudios de Peru en el empesijo no era muy oroza. El primer auto da fe (kemar las personas por ser djudyo o ser kontra la relijyon) akontesyo  en Disiembre de 1595. Estos kavzos sin piyadad i kruelos, de kulpabilidad predeterminada se repetaron en 1600 i 1605. En 1639, el mas grande auto-da-fe  akontesyo en Lima. Mas de 60 personas, akuzados de azer parte de La Komplisidad Grande (La Grande Kongregasyon), fueron djuzgados por pratikar i/o rekomendar el djudaismo.

La fin de la Enkizisyon en Lima en 1806 sinyifiko ke los djudios podiyan venir a Peru i bivir avyertamente i sin sekana.

Los jdudios de Maroko vinyeron i lavoraron komo kasadores (avcı) i komersantes en el empesijo del siglo XIX. En la dekada de 1870, uvo una afluensya de djudios de Alsace, Fransia. Entretyempo se asimilaron al puevlo en jeneral, establesyeron la Sociedad de Beneficenci Israelita, ke egziste oy en diya tambien. En este mizmo tyempo, uvo una pujita en la demanda de kauchuk, ke travo munchos aventureros al interyor del pais. Una komunidad djudia mas chika se formo en la rejyon interyor de Iquitos, i aunke esta komunidad no pudo mantenerse, desho una marka en la rejyon de tala manera ke un nombre sorprendente de sus desendyentes se prezentan oy bushkando de reunirsen kon el puevlo i komunidades djudios.

La Primera Gerra Mundial travo a los djudios del Imperio Otomano ke peryo la gerra, de Turkia, Siria i del norte de Afrika. Es interesante de observar ke ay referensyas partikulares a la imigrasyon a Lima i otras sivdades sudamerikanas de un grande grupo de djudios de la sivdad de Novoselitsa en la frontyera de la Romanya.

La populasyon djudia de Lima nunka no fue grande. Oy malgrado una povlasyon chika, ay unas kuantas sinagogas aktivas i la eskola Leon Pinelo para servir a esta komunidad de un poko mas de 2,500 myembros.

 

 

Siz de yorumunuzu yapın

Tüm Yorumları Görün