Le semana ultima tuve el plazer de irme kon mis amigos a la eskola “Ulus Musevi Lisesi” para asistir al teatro de “Göztepe Kültür Derneği”.
Göztepe es una asosyasyon ke arekoje a los mansevos i mansevas djudyos; i aze ovras i aktivitades kulturales komo teatros, paseos, partis para adjuntar los djovenes en entegrandolos a estas aktivitades.
Los volontaryos ke lavoran en esta organizasyon lavoran de aryento del korason, kon muncho amor, ardor, pasyon i kerensya i esta ambisyon de reushir, kon la konfiensa ke tyenen vense todas las difikultades i depasa todos los detenimyentos en sus kaminos.
El teatro iva ampesar a las mueve. A las ocho i medya no aviya kaji lugar de asentar de tanta djentorya. En la eskola no ay problema porke mizmo de detras, en la sira de alkavo se puede ver i oyir komo kale. Tanta djentorya ke metyeron i siyas por demaziya.
El nombre del teatro: “Keres Kazarte Kon Mozotros?” (Bizimle evlenir misin?).
El presidente “Doğan Yıldız” izo una avla kurta en dizyendo ke vamos a kitar muevas lesones de esta piesa.
“La piesa tyene un ekipo de teatro muchedumbre, yeno de kriyaturas, mansevos i grandes. La kara riyendo de los chikos, el djugo reushido i la enerjiya de los mansevos, la eksperyensya de los grandes, muestras buenas relasyones entre todos mos mostro la rikeza ke tenemos de ser endjuntos toda la komunita djudiya.”
El sujeto de la pyesa es: Ay dos famiyas, la una moderna, la otra tradisyonalista. La istorya de estas dos famiyas, de los ijos ke se keren kazar i la istorya de todos los myembros de la famiya.
Sus tradisyones, kompreansyones, la tolerensya de unos a los otros para pueder ayegar a kazar a los ijos.
El padre de la novya i la madre son la famiya moderna, rikos, una kaza grande byen dekorada, la madre un poko reganchona (şımarık), byen vistida, el padre ombre de echo todo komo kale. No tyenen haber de las tradisyones djudias. La famiya del novyo, komo savemos la madre, madre djudiya ke se va mesklar a todo, el padre ke se kontenta de lo ke dize. Una gramama ke kere azer todas las tradisyones komo kale, komo la razon ke tyene, dos ermanas del padre ke no son kazadas, ke biven endjuntos: una famiya muchedumbre (kalabalık).
Todos muy buenos aktores komo profesyonales azyendo sus rolos de una manera manyifika, veramente estavan djugando komo ke estavan bivyendo sus rolos. Munchas felisitasyones……
En primero las dos madres se konosyeron i despues las madres, los padres i los novyos salyeron endjuntos a bever un kafe. Arrebivyeron de una manera perfekta la diferensya de las dos famiyas.
La novya i el novyo keryendo tomar data, tomar dia de la sinagoga. La gramama mesklandose en dizyendo: no se kaza en este mez, ay las fyestas, ay dias de taanit, ay Tisha Beav i otras hohentas…
La famiya del ijo keren ke bivan en frente, la madre i el padre de la novya ke bivan en la partida Evropea i el ashugar, el mikve de la novya, la djente ke se va envitar, todo problemes.
Mostraron ke, si dos mansevos keren kazarsen en primero kale ke se kazen las famiyas en uydeandosen, en azyendo idare los unos kon los otros para ke los mansevos seyan orozos.
Lo ke me atiro la atansyon en esta pyesa, es ke del mas chiko aktor fin al mas grande komo de talento!
Todas las kantikas muy sentimantales; kon las bozes maraviyozas, la fuersa del djugo, la dominasyon de la shena, el dirijir esta pyesa, la orkestra, el dekor i los kostumes, las luzes, el makyaj…
Veramente, yo penso, ke esto es un lavoro de lokos. Arekojer a tantas personas; mujeres, ombres, mansevos, mansevas, kriyaturas, ayudantes, ambezarles a kantar, avlar, djugar, azer provas, en dias i oras diferentes; porke todos estan lavorando u estudyando.
Syempre de mijor a mijor.
Felisitasyones a todos los dirijentes del Göztepe Kültür Derneği, de tener la veluntad de krear estos projektos; para pueder detener la manseves djudiya entre eyos i para evitar la asimilasyon!
La amistad ke tenesh entre vozotros, ke puje de dia en dia para motivar i adelantar vuestra organizasyon kon munchas reushidades!
