Forti Barokas
Una mitsva del Koro NES. Felisitamos al Koro NES por la grande mitsva ke izieron salida de Simhat Tora en el ospital Balıklı Rum, a las pansyoneres. La muzika siempre da alegriya al korason i un hazino ke ya esta demoralizado de estar hazino, lo ke kere es un poko de alegriya. El Koro NES, en dando alegriya a todos para ken kantan sige aziendo sus mitsvot.
El Ekipo de Judeo-Espanyol del Şalom
El 3 oktobre myerkoles demanyana el koro NES kon su dirijador, İZZET BANA, tuvyeron la onor de ser envitados a Balıklı Rum Hastanesi (el ospital) para dar un konserto a los pansyoneres. El tyempo favorizo, las dammas benevolas (PEMBE MELEKLER - Los Anjeles Rozes) kon grande pasensya i kerensya trusheron a todas las hazinas a la guerta para ke se alegren i topen un poko de moral. Izzet izo un repertuar de kantikas alegres i lo mas de las dammas kantaron kon el koro endjuntos. Kreyemos ke salida de Simhat Tora les dimos un poko de simha. Rogamos refua shelema a todos los hazinos i felisitasyones a todas las dammas benevol ke estan penando kon grande ardor.