Los doktores italianos enganyaron a los nazis en enventando esta enfirmedad falsa.
En 1943, una ekipa de doktores harrifes italianos enventaron un virus mortal i kontajyozo ke dyeron el nombre “Sendrom K” para protejar a los djudios de una muerte imminente. El 16 de Oktobre de 1943, kuando los nazis desidaron de likidar el ghetto djudio de Roma, munchos fujitivos se eskondieron en el Ospital Fatebenefratelli, de 450 anyos. En el ospital, los doktores antifashistos komo Adriano Ossicini, Vittorio Sacerdoti i Giovanni Borromeo krearon una hazinura orrivle i imajinaryo.
Enriva de los dokumentos de los “hazinos” estamparon el byervo “Sendrom K” para endikar ke el “hazino” no era hazino ma era djudio o djudiya i teniyan menester de una prtoeksyon absoluta. Esto lo konto el anyo pasado el Doktor Ossicini al periodiko italiano, La Stampa. La letra “K” reprezentava Albert Kesselring i Herbert Kappler, dos komandantes nazis ke teniyan el dezeyo de eliminar a todos los Djudios de Roma.
Los doktores ambezaron a los “hazinos” ke deviyan de toser muy fuerte i disheron a los nazis ke esta hazinura era ekstremamente peligrozo, desfigurava i era “molto contagioso”, muy kontajyozo. Los soldados estavan tan alarmados por la lista de semptomas i de oyer las toses en todas partes del ospital ke decharon sin kontrolar loz hazinos i se fuyeron komo dizimos “los pyes deskalsos”. Se estima ke unas kuantas dozenas de vidas fueron salvadas por este briyante i entelijente senaryo.
Los doktores médicos fueron onorados mas tadre por sus aksyones eroikos, i el Ospital Fatebenefratelli fue deklarado “Kaza de la Vida” por la Fondasyon Enternasyonal Raoul Wallenberg.
