Avinu Malkenu

Metin DELEVİ Judeo-Espanyol
23 Eylül 2021 Perşembe

Keridos lektores, Tizku Le Shanim Rabot i Gmar Hatima Tova.  Vos sueto una anyada kon sanedad i paz.

La semana pasada me enteresi kon la orasyon Avinu Malkenu i topi un artikolo sovre esto i lo adapti para partajarlo kon vozos.

Dinguna orasyon no amostra tan a fondo la relasyon dual del puevlo djudio kon Dyo komo Avinu Malkenu, "Padre muestro, Rey muestro". Si bien Avinu Malkenu es una orasyon konosida por ser parte de la liturjiya de Rosh Ashana, tambyen se melda durante Aseret Yamey Teshuva, los Diez Dias de Arrepentimyento entre Rosh Hashana i Yom Kipur i en los dias de ayuno, de taanit.

 La formulasyon egzakta de esta orasyon se baza en una orasyon ke el Rabbi Akiva (c. 50 - c. 135 E.C.), uno de los mas grandes savyos del Talmud, meldo  durante una sekura. Despues de ke las orasyones de la komunidad no sirvyo i no vino la luvya, Rabbi Akiva se alevanto i grito al Dyo: “Padre muestro, Rey muestro, no tenemos mas otro rey ke Tu, Padre Muestro, Rey Muestro, ten piyadad de mozotros!”.  No paso unos kuantos segondos ke empeso la luvya. Puede ser una lejenda, ma kedo en la memorya de los Djudios. I de akel dia asta oy se melda esta orasyon.

 La orasyon de Avinu Malkenu inkluye 44 linyas i la mas famoza es la deklarasyon: “Padre muestro, Rey muestro, ten miserikordiya de mozotros i respondemos, aunke no tengamos ovras i aktos  dinyas, komportate kon mozotros kon djustisya i buendad i salvamos."

En yamando a Dyo komo “muestro Padre” i “muestro Rey”, dirijamos muestras orasyones en dos modos diferentes. De un padre se espera mizerikordiya, amor i pardon. Un padre mira a su kriyatura i solo ve su chiko, este individuo spesyal i instintivamente syente miserikordiya por el chiko, un produkto de su propya karne i sangre. Por esto, en el Día del Djuzgo, dezeamos dirijir muestras demandas partikularmente al aspekto paternal de la miserikordiya del Dyo.

De otra parte, un rey kontrola el destino de sus suditos. El governa, kon mizerikordiya i djustisya. Por lo tanto, tambyen devemos dirijir muestras orasyones a estos aspektos del Dyo durante Rosh Ashana i durante los dias sigyentes  (asta Yom Kipur inkluido). Despues de todo, este es el momento en ke El Dyo se asenta kon Sus Livros del Djuzgo avyertos delantre de El. En referandomos a Dyo komo muestro Rey, mos akodramos de muevo ke aunke El mos ama komo padre, tambyen devemos estar respektuozos por la grandeza i majestad del Dyo.

Vos konsejo de sintir esta melodia meldado por el Hazan Maçorro i kantado por la famoza Barbra Streisand.

Siz de yorumunuzu yapın

Tüm Yorumları Görün