28 Eylül 2021 Salı 16:22

Las Sinagogas de Turkiya i una ekspozision

Silvyo OVADYA Judeo-Espanyol 1261 görüntüleme
28 Temmuz 2021 Çarşamba

Va empasar esta semana para dizirvos ke estuve muy kontente de resivir un e-mail del Profesor Devin Naar. Es en mi artikolo sovre el livro Los Itinerarios Sefaradis ke eskrivi unos kuantos biervos sovre el profesor Naar ke lo topo muy kapache. Komo eskrivio en su mail, kreo ke vamos a tener syertos kontaktos kon el i komo tenia bastante tyempo le eskrivi una partida de lo ke esto aziendo. Lo deskulpi i kreo ke vamos a pueder kolaborar.

  Esta semana vos kero avlar un poko sovre el livro “Sinagogas de la Turkiya” ke va ser publikado por la segunda vez. La primera fue en el anyo 2008 por el Gözlem. I es la Fondasion del Muzeo ke va publikar por la segunda vez este livro. Buen karar de kozas trokaron en 13 anyos. Las sinagogas de Edirne, de Gaziantep, de Kilis i de Bergama fueron restoradas por la Direksion de las Fondasiones i la Sinagoga de Bergama por la Munisipalidad. Kreo ke sintitesh el projekto ke estan realizando los Izmirlis en Kermeraltı. Estan restorando sesh o syetes sinagogas ke se topan una al lado o enfrente de la otra i van a reflektar la Erensya Kultural de los Djudios Izmirlis. Es el Sinyor Nisim Bencuya ke se topa en la kavesa de este projekto siguro kon el grande apoyo de la Komunidad Djudia i resiven buen karar de ayudo para este projekto. En Alsancak, se topava la Sinagoga Shaar Aşamayim ke era frekuentada  por los Djudios ke moran en Alsancak. El edifisio tenia syertos problemes i lo derokaron para azer una sinagoga i un Sentro Djudio. Reelmente izyeron una maraviya. Malorozamente kon esta desgrasia de Corona los mansevos kreo ke no se sirvieron bastante del muevo sentro. Kreo ke este anyo van a pueder emplear el muevo Sentro.

  El livro va ser publikado en dos linguas: en Turko i en Inglez ma diferentemente. Para realizar este livro munchas personas i firmas komersiales mos ayudaron materialmente. Ya se ke en Septiembre estamos fyestando muestras fiestas empesando por Rosh Hashana el 7 de Elul. Ma keremos azer una ekspozision para prezentar el livro i kreo ke el Sinyor Keribar i el Sinyor Güleryüz lo van a firmar en este diya. Ma kreo ke esta ekspozision deve de ser ekspozada en otros payizes i otras sivdades. En Madrid estan formando un Muzeo Djudio i les va proposar de realizar esta ekspozision. En Paris ay un Muzeo sovre los Djudios Sefardis i malorozamente no tenemos dingun kontakto kon eyos. Oy eskrivi mizmo al Profesor Naar, demandandole deke no pensamos una koza asemejante en Seattle.

   En Estanbol devemos de azer esta ekspozision en un grande edifisio ke tyene una sala para ekspozisyones. Un lugar istoriko ke no tyene dingun dar i aver kon los Djudios. Una sinagoga antigua ke no se emplea mas. En un lugar istoriko restorado. En una Sisterna. Los tyempos dalkavo la Munisipalidad d’Estanbol restoro syertos sitios industriales ke no se emplean oy en dia komo el “Gazane” de Hasanpaşa. I me esto indo a estos lugares para ver si reelmernte lo puedemos realizar aya.  Ay dos semanas ke estamos avlando sovre esto. A la fin muestros amigos disheron deke no azemos esta ekspozision en la entrada de una sinagoga ke todo el mundo kere vijitarla. Vamos a avlar kon los dirijentes de estas fondasiones para dar karar. I kreo ke lo van a vijitar kon la entrada del muzeo i este modo van a tener la posibilidad de vijitar i el Muzeo Djudio.

Siz de yorumunuzu yapın

Tüm Yorumları Görün
Yorum Yapmak için üye girişi yapın!Yorum yapabilmek için üye girişi yapmanız gerekiyor...
Üye Girişi yapmak için Tıklayın

İLGİLİ HABERLER

İLGİNİZİ ÇEKEBİLİR

Şalom TV GZ

MOZOTROS AİLESİ - İrvin Mandel

MOZOTROS AİLESİ - İrvin Mandel

TÜNELİN UCU - İzel Rozental

TÜNELİN UCU - İzel Rozental