26 Eylül 2021 Pazar 14:59

TU B´AV, DIA DE AMOR

Dora NİYEGO Judeo-Espanyol 990 görüntüleme
28 Temmuz 2021 Çarşamba

Mezmo ke Tu B’Av es un diya de fiesta komo esta eskrito en el Talmud, esta fiesta empeso a selebrarse en los anyos dalkavo en Israel. Tu B’Av se selebra kon bayles, rozas koloradas, i kantikas de amor en la radio.

Las paredes de Yerushalayim fueron, un tiempo, la fuente de enspirasion del amor. Miles de anyos antes, kuando dainda el mundo no aviya oyido del diya de San Valentino, el mundo judio aviya kreado un festival de amor en el sentro de Yerushalayim.

Debasho del lunar en kinze, en los diyas de enverano, las mansevas vistidas en blanko, baylavan en los kampos, afuera de las paredes de Yerushalayim. Los mansevos se ivan a los kampos kon la esperansa de topar una novia. Esta fiesta se yama Tu B’Av porke se selebra en el kinze del mez ebreo de Av. Tu B’Av se selebra una semana despues de Tisha B’Av, el mas triste diya de los judios.

Tu B’Av se selebra afuera de las paredes de Yerushalayim, leshos del Monte de Templo, el lugar de la destruksion.

Tisha B’Av es el diya kuando el Dio deklaro ke los judios van a pasar kuarenta anyos en el dizierto. Tu B’Av es el diya kuando kuarenta anyos despues, los 15.000 judios ke kedaron de la jenerasion del dizierto, entraron a la Tierra Prometida. En este diya, el Dio pardono el puevlo judio por el pekado ke aviyan echo: aviyan konstruido un bezerro de oro, i despues aviyan empesado a adorarlo.

En el Talmud eskrive ke nunka no uvo en Israel, mijores diyas ke del kinze de Av, i el Diya de Atonamiento.

En Tu B’Av, las ijas de Yerushalayim baylavan en las vinyas, kantando ‘Mansevos, alevanta los ojos, i mira kuala manseva vash a eskojer. No fiksesh los ojos solo a la ermozura, ma mira ke la ija ke vash a eskojer seyga de buena famiya. La ermozura vos puede trompar, ma la mujer ke tiene espanto del Dio, es la mas alavada’.

Deke el anyo judio eskapa kon una selebrasion de amor? Una repuesta a esta kestion es ke ‘el judaizmo da muncha emportansa al amor en las relasiones’.

En Tu B’Av, todas las mansevas i los mansevos se visten vistidos blankos porke blanko es la kolor de la semplisidad. Esto kere dizir ke las valores materialistas no deven enfluensar los mansevos kuando van a eskojer una partenera. Los mansevos deven de mirar debasho de las valores superfisieles, antes de kazarsen.

Tu B’Av es un grande diya para bodas, seremonias, azer propozisiones de kazamientos. Es el diya de amor ke se selebra kon kantes, bayles, rozas, i meldando la Tora. En esta fiesta se pasa mas muncho tiempo meldando la Tora, porke los diyas santos empesan a vinir.

Siz de yorumunuzu yapın

Tüm Yorumları Görün
Yorum Yapmak için üye girişi yapın!Yorum yapabilmek için üye girişi yapmanız gerekiyor...
Üye Girişi yapmak için Tıklayın

İLGİLİ HABERLER

İLGİNİZİ ÇEKEBİLİR

Şalom TV GZ

MOZOTROS AİLESİ - İrvin Mandel

MOZOTROS AİLESİ - İrvin Mandel

TÜNELİN UCU - İzel Rozental

TÜNELİN UCU - İzel Rozental