Despues de los Sesenta

Judeo-Espanyol
7 Temmuz 2021 Çarşamba

Hayim Behmoaras

Ijo de un mamzer, neredeysa ke se va azer un anyo i medyo de este negro mazal de
CORONA, ke mos shasheo la vida, i el mazal.
Ni salir, ni entrar manko ke lo veyga. Si tyenes 65 anyos ya komites el bonbon,
despues de las 14.00 no puedes salir a la kaye, de las 10.00 fin la 14.00 no te puedes suvir al
otobus, si tyenes 65 anyos, ma si te estas sintyendo de 35 anyos ya puedes salir, si tyenes 16
anyos kon la mama, si tyenes 25 anyos kon la namorada ya puedes kaminar, si keres tomar
alkol solo puedes tomar kolonya!
Teniyamos medyo meoyo, i kon esto lo peryimos todo.
I en esto, antes 15 dias en Estanbol, tuvimos un rash chiko, ermano ay corona, entra a la kaza,
mos estamos meneyando; empeso el rash, sal de kaza, si no lo fuyimos es bueno. Patron del
mundo, Tu apiyadamos.
I agora ay una koza mueva, despues de varyant DELTA, agora mos vino otrun inyeto varyant
LAMBDA komo Lambada, esta vinyendo de Şili, si te apegas, te estas indo en baylando.
Neysa agora kon el nombre del Dyo, ya mos avrimos en regla, inshallah no mos aze muncho
koryente.
Agora achakes de los vaksines, estamos un poko repozados i por esto, me dishe de mi para
mi, avrire a Izak un telefon i mos toparemos en un lugar para trokar de tavan. I le telefoni, se
gusto muncho i mos topimos en Şişli.
Izak djanum, el manifaturadji ke teniya butika en Galata. Neysa kurto vo lo azere, mos
asentimos en un cafe. Ay un anyo, no vinimos lado kon lado, solo kon watsap avlimos, loores
al Dyo ya mos topimos, por esto estavamos komo salen a la entrevista .
Tomimos 2 nescafes, una pastika, un chini de borrekitas (3 deyos) i un chayiziko
i allado, el heshbon, vino otruna corona: 185.00 TL! oras buenas. Mira negromazal, aspera
kuando mos vamos a alevantar para trayer el heshbon, noo! 
Neysa pasado ke mos seya dishimos, ma parese ke de agora endelantre todo se vazer un poko
mas duro.
Avlimos de aki, de aya, de la plasa, del pais, de las famiyas, entremyentes me olvidi ke tengo
maska en la boka el chay me lo kije bever, bodji enriva!
Bendicho el Dyo ke no me kemi. Kualo estava dizyendo? Aaa de las famiyas estavamos
avlando, me disho enverano kualo vash a azer, le dishe si keres mos iremos a Bodrum para
komer a 100.00TL un lahmacun, para mozos se disho, se empeso a riyir.

Me parese ke estava muy yeno, i empeso a kesharse de la mujer, kada dia gizar, lavado,
alimpyar se aze, me esta dizyendo.
Le dishe ooopppss, Izakito pasha aya estate, por sedaka no te keshes de tu mujer. Mira mi
mujer se opero ay 1,5 mes ke no salgo. Demanyana me esto alevantando kon el handrajo fin a
la noche esta en la mano, gizar, lavado, fregar todo en mi, un lavado esto azyendo blanko
komo la leche, un fregado los chinis komo espejo, gizar si dizes te chupas los dedos. Kada dia
toma polvo, apareja dezayuno, midi i noche komer, aaa alas 17.00 un chayiziko, me ize mas
rubisa de mi mujer. Dia entero en la nariz tengo golores de sevoya, de azete, de gizado no
kero oyer mas ni oyer, ni sintir kozas de komida.
Por esto pasha kuando te vas a keshar de tu mujer, 5 puntos te vas a pensar. Si 
keres 2 dias troka lugar kon tu mujer, por mi vida te fuyes deskalso, i despues empesas a dizir
"hanumika, luzya de mi kaza".
Despues de los sesenta, mos anbezimos munchas kozas, yo me ambezi kualo es mujer de
kaza, para tener en piyes a la famiya, i para azer la kaza oroza, ke pena ke estan travando.
Eyas son komo diamantes ke no se pueden meter la vador. Ken nos mos manken de las kazas i de las famiyas

Asta la fin endjuntos!

Siz de yorumunuzu yapın

Tüm Yorumları Görün