Otrun aniversaryo triste del mez de Junio

Metin DELEVİ Judeo-Espanyol
30 Haziran 2021 Çarşamba

El mez de Junio del anyo 1240 no fue un buen tyempo para los djudios de Evropa. Los problemes empesaron kon un djudio, apostato ke troko de relijyon i se izo kristiyano i se yamava Nicholas Donin. Keryendo, puedeser, amostrar su fidelidad i kreyensa a la eglizya, enbiyo una letra a las otoridades kristiyanas enumerando 35 afirmasyones kontra el Talmud. Munchos de estas afirmasyones eran detalyos de tekstos ke aparamente, sovre su entendimyento, estavan arrebashando Yeshu o Mari o todos los dos endjuntos. De otra parte, sovre el,  estos tekstos del Talmud estavan kontando istoryas insolentes o transmitiyan otros mesajes "ofensivos". La letra fue finalmente embiyado al Papa Gregory IX.  El Papa desidyo de organizar un debate en el kual Donin iva eksplikar sus akuzasyones kontra kuatro prominentes rabinos fransezes: el Rabino Yechiel de París, el Rabino Moshe de Coucy, el Rabino Judah de Melum i el Rabino Samuel, ijo de Salomon de Chateau-Thierry.

La “Disputa (o disputasyon) de Paris”, komo se konosyo en la istorya, el debate, fue una disputa kon un rezultado inevitable. Aunke la reyna garantizo la seguridad de los rabinos para ke pudyeran responder libremente, egzistiyan limitasyones striktas sovre lo ke se les permitiya dizir, sovre el Kristiyanizmo i la Eglizya.

El portaboz prensipal djudio, el Rabino Yechiel, fue kapachi de dar repuestas konvenivles i apropriados durante la disputa. El pudo responder entelijamente i reformular las akuzasyones  de arrebashamyento de Donin. Por egzemplo – un egzemplo de la intelijensiya djudia! - disho  ke en los puntos mensyonados ke se referan a Yeshu, se tratava simplemente de dos ombres kon el mizmo nombre, i ke estos pasajes ande se topan arrebashamyentos eran sovre un ombre diferente i ke se yamava por azardo Yeshu!

Komo se esperava, la disputa se eskapo kon una kondamnasyon del Talmud i otros eskritos rabinikos. Se desidyo ke estos tekstos i livros sakros djudios deviyan ser konfiskados i destruyidos. Dos anyos mas despues, se yevaron a París 24 talikas yenas de livros ebreos, inkluidos munchos volumes del Talmud, i los kemaron, esto, antes de la impremeriya, ¡ kuando todos los livros se eskriviyan a mano! Tan grande fue la piedrita, ke la data de la kemadura del Talmud fue posterioramente markada komo un dia de ayuno ke fue observado por munchas komunidades djudias en la Evropa en el mez ebreo de Sivan.

La kemadura del Talmud despues de la Disputa en París tuvo lugar el 17 de Junio de 1244.

Siz de yorumunuzu yapın

Tüm Yorumları Görün