28 Ekim 2021 Perşembe 19:32
Op Dr Mücteba Gündüz

EL TEMPLO DE ZEUS

Eliz GATENYO Judeo-Espanyol 1207 görüntüleme
26 Mayıs 2021 Çarşamba

Sigun los istoryanos de la era antigua, la sivdad de Bergama fue la kapitala de un reynado ke egzistyo en los siglos 3 i 2 antes de Jesukristo. Su ultimo rey Attalos III la izo regalo al Imperio de Roma en el anyo 133 antes de Jesukristo. Esta sivdad era el sentro de la sivilizasyon Elenistika i teniya munchos edifisyos delikados.  Una de las mas emportantes es el Altar de Sakrifisyos de Zeus, yamado tanbien Pergamon. Pergamon es el nombre antiguo de Bergama. El altar de Zeus fue fraguado en el sigundo siglo antes de Jesukristo, para la komemorasyon de la viktorya del Rey Umenes II. Umenes gano la gerra kontra los Galates. Este altar fue dedikada a la onor de Zeus i Athena.

El jurnalisto Yalçın Bayer teniya eskrito en su jurnal detalyos sigun kualos en el anyo 1878 el injenyor alman Karl Human estava lavorando para azer kaminos. El topo en las ekskavasyones pedasos del Altar de Zeus.

Kon la permisyon del Governo Otomano, arkeologes alemanes reusheron a arekojer todos los pedasos, en deshando solo la baza en su lugar.

Ansina es ke el templo fue transferado en partidas, pedaso a pedaso a Berlin. Aya fueron montados estos pedasos minusiyozamente. Agora este templo esta ekspozado en un salon espesyal del muzeo yamado “Pergamonmuseum” en Berlin (Alemanya).

El Governo Turko esta azyendo pasos diplomatikos para transferar esta maraviya a la Turkiya i enstalarlo ensima de su baza orijinala ke se topa en el Muzeo de Bergama. El Ministro de la Justisya de 1999, Hikmet Sami Türk, se teniya okupado seriozamente de este kavzo. Los moradores de la rejyon de Bergama,  estan asperando kon emosyon el diya ke van aresivir el altar de Zeus, en su payis de nasimyanto, el altar de Zeus ke es uno de los edifisyos los mas maraviyozos de la epoka Elenistika.

P.S. Este biervo “Altar” en ebreo es “Mizbeah”. El templo ande se aziya los sakrifisyos, los korbanes era en el Beit Hamikdash.  En turko se dize “Sunak” i en fransez “Autel”.

Siz de yorumunuzu yapın

Tüm Yorumları Görün
Yorum Yapmak için üye girişi yapın!Yorum yapabilmek için üye girişi yapmanız gerekiyor...
Üye Girişi yapmak için Tıklayın

İLGİLİ HABERLER

İLGİNİZİ ÇEKEBİLİR

Şalom TV GZ

MOZOTROS AİLESİ - İrvin Mandel

MOZOTROS AİLESİ - İrvin Mandel

TÜNELİN UCU - İzel Rozental

TÜNELİN UCU - İzel Rozental