17 Mayıs 2021 Pazartesi 04:14
Zen Poliklinik 1 nolu alan
Zen Poliklinik 1 nolu alan

KADA UNO METE LA MANO ANDE LE ERGUELE

Forti BAROKAS Judeo-Espanyol 943 görüntüleme
21 Nisan 2021 Çarşamba

Un proverbo muy djusto, digamos proverbo yerrado no ay. Kon la vinida de la primavera dishe el moral ya se va enderechar un poko ma malorozamente yene mos enserrimos, de oyir las novelas no muy famozas, los ospitales yenos, tornimos a los primeros diyas i esto mos esta azyendo pena, sin kerer, estamos entrando en una depresyon kada uno a su modo. Sovretodo los elevos, oras i oras kon un tablet penando a entender lo ke esta avlando el profesor. Fui testigo en azyendo lisyon mi inyeto, seya para los elevos seya para el profesor, fin de mundo.

Komo dishe ariva kada uno mete la mano ande le erguele. Para mi, fin de mundo ke estan serrados los salones de teatro ke ir al teatro era el mijor divertimyento miyo. Agora vash a dizir otro mal ke no ayga; siguro ke la sanedad en primero, ma esto afrita de un plazer. Lo mas ke me aze pena de oyir es ke los salones de sinema estan avyertos; ke ya estamos artos de ver filmos en netflix i en la televizyon, de ver a los artistos i artistas de teatro sin echo, muertos por el grosh i tristes de no pueder salir a la shena.

Siguro ke no me va komparar kon los profesyonales ma i yo esto triste de no azer teatros, ke es mi bueno. Por esto vo eskarvando en el google artikolos sovre el teatro i kuryozo topo ermozas eskritas. Unas de eyas las vo partajar; siguro ke eran en turko, las traduizi.
 
La vida es komo un teatro, las personas negras se asentan en los mijores lugares, de sorte ke los djugadores deven de djugar para los rangos de alkavo. (ARISTOFANES)
 
Los espantozos mueren mil vezes antes de murir, los korajozos dizen una vez me va murir, por esto los djugadores en salyendo a la shena kale ke seyan korajozos. (SHAKESPEARE)
 
Las difikultades pujan la valor de la reushita, por esto a los djugadores kale ke les plazga el difisil. (MOLIERE)
 
El ke lucha pyedre, el ke no lucha ya pyedro, por esto el djugador kale ke luche. (BRECHT)
 
El teatro es una eskola ke ambeza a yorar i a riyir, i es un tribunal independente, por esto el djugador kale ke seya djusto. (LORCA)
 
Alguno si avla detras de vozos es ke estash adelantre de el, por esto el djugador kale ke seya pionero. (CHEHOV)
 
Drama es egzajerar los sentimyentos, por esto el djugador kale ke seya vizyonaryo.  (IONESCO)
 
El pesimizmo es muncho mas negro del kanser, por esto el djugador kale ke seya optimisto. (MUHSİN ERTUĞRUL) 
 
Dezeo un mundo ande toda la djente del teatro pueda eskrivir i djugar sin limitasyones i todos los amantes del arte seyan valorados.
 
 

Siz de yorumunuzu yapın

Tüm Yorumları Görün
Yorum Yapmak için üye girişi yapın!Yorum yapabilmek için üye girişi yapmanız gerekiyor...
Üye Girişi yapmak için Tıklayın

İLGİLİ HABERLER

İLGİNİZİ ÇEKEBİLİR

GZ

TÜNELİN UCU

TÜNELİN UCU

MOZOTROS AİLESİ

MOZOTROS AİLESİ