22 Nisan 2021 Perşembe 06:09
Now Hair Time

Un otro artikolo sovre la Corona

Silvyo OVADYA Judeo-Espanyol 1926 görüntüleme
7 Nisan 2021 Çarşamba

   Ay unos kuantos mezes ke esto azyendo esforsos para no avlar en mis artikolos sovre la Corona. En Estanbol, en Turkiya i en la mas grande partida de los payizes Evropeos vemos ke malgrado ke estan vaksinando el puevlo (ma sin adjile); no estan reushendo a eskapar esta bela. Vemos ke el payis ke reusho kon un grande sukseso es Israel. Ya savemos ke tyene una populasion un poko mas muncho ke 9 milyones; ma komo es un payis bastante riko i ke los dirijentes pagaron bastantes paras para merkar las vaksinas; la reushitad fue realizada mas presto. I komo es un payis ande se topa bastantes personas de sensia, los produktores achetaron de ver los resultados en un payis asemejante. “Un payis adelantrado de punto sientifiko, i ke tyene una populasion rezonavle. La Australia i la Nueva  Zelanda son los otros payizes ke estan repozados kon el problem del Covid. Los otros payizes ke estan lavorando para eskapar este malor son los Estados Unidos i la Inglatiera. Ya savemos ke el problem va ser rezolvado kuando los 75% de la populasyon mas aedada de 20 anyos van a ser vaksinados.

  Ay syertos payizes ke mekaron kreo dos o tres vezes mas de lo ke teniyan de menester. De ke? No es posivle entender. Ya savesh ke los ijikos azen kompetisyones en pishando! I el ke pisha lo mas leshos es el ke gana. Fue la misma koza para los payizes para merkar las vaksinas. Ma se komportaron komo estas kriaturas no pensando lo ke va afitar merkando dos o tres vezes mas de lo ke tenian de menester. Ya se ke la Inglatiera tenia de menester de 100 milyones de vaksinas i komo son rikos merkaron 400 milyones. De ke? Esto es azer mal a la umanidad.

   En muestro payis, en Turkiya empesimos a vaksinarmos kon la vaksina Chineza SinoVac. I devo de dizir ke me vaksinaron dos vezes kon esta vaksina chineza. Es dyes diyas antes ke reusheron a obtener la primera partida de las vaksinas Biontech ke fue topado por dos turkos ke biven ay anyos en la Alemanya: el profesor Uğur Şahin ke es el ijo de una famiya turka ke era uno de los primeros turkos ke imigraron a la Alemanya komo lavorantes i la Doktoresa Özlem Türeci ke es su mujer es la ija de un doktor turko ke lavorava en Alemanya. Ay anyos ke azen bushkedades en sus laboratoryos para topar una kura sovre el kanser. I vemos ke en estas bushkedades ay muncos turkos ke lavoraron para reushir a topa una vaksina. No es ke lavoran kon este grupo. Ma ay munchas bushkedades en los Estados Unidos i ay turkos i Djudios Turkos ke lavoraron i kontinuan a lavorar en este kampo.

   Estavamos muy seguros ke los Israelyanos ivan a ser kapaches para topar una vaksina kontra esta hazinura. Ya se ke no toparon dainda. Ma se esta avlando ke estan azyendo bushkedades sovre una kura ke se va emplear kuando vamos a aferrar la Corona. Espero ke este enverano va ser la fin de esta hazinura. El governo Turko dyo karar ke la djente se van a kedar en kaza diya de shabat i diya de alhad. Dia de shabat mos fuimos de Machka asta Şişli porke mi mujer se devia de vaksinar. I kon la vaksina Biontech. Las kalejas estavan yenas de djente. Mizmo en la grande kaleja de Valikonağı avia kolas de arabas. Los parkes estavan yenos de djente. Dingunos no estan respektando las reglas.

  Avlando de las vaksinas; no es muy fasil de dar karar kualo es el mijor? Todos tyenen syertas kozas ke son mijores de las otras. Es muy difisil! Va ser un problem por los ke se vaksinaron kon el vaksen Chinezo para viyajar a los payizes Evropeos. Se dize ke van achetar personas vaksinadas kon los vaksenes achetados por los payizes Evropeos. Ay una amiga ke avlo kon el Ambassador de Espanya i disho ke la Espanya deve de achetar sus sivdadanos kon un test “pcr”. I yo kreo ke va ser de esta manera kuando este malor se va eskapar o a lo manko amenguarse. Bivir i ver…

Siz de yorumunuzu yapın

Tüm Yorumları Görün
Yorum Yapmak için üye girişi yapın!Yorum yapabilmek için üye girişi yapmanız gerekiyor...
Üye Girişi yapmak için Tıklayın

İLGİLİ HABERLER

İLGİNİZİ ÇEKEBİLİR

GZ

TÜNELİN UCU

TÜNELİN UCU

MOZOTROS AİLESİ

MOZOTROS AİLESİ