Eric Schwam i su famiya eran orijinarios de Vienna i en el tiempo de la Segunda Guerra Mundial se refujiaron en Chambon-sur-Lignon, un kazal en el sudeste de la Fransia, en las Pyrénées Orientales. No se save komo, verso la fin de1942, Eric, ijo uniko, sus padres i su gramama maternal, pudieron yegar a este lugar. En este tiempo de los Nazis, kon la inisiativa del Pastor protestante André Trocme i su ayudante Eric Theis, los kazalinos salvaron i guadraron los Judios en sus kazas. En saviendo ke estan tomando riziko grande de vida, les ayudaron a traversar las montanyas para ke puedan pasar a la Suissa.
Chambron-sur-Lignon tiene una grande komunidad protestante i fue siempre un simbolo del protestantismo fransez. El puevlo de esta rejion, es konosida por su tradision de guadrar las personas ke fuyeron de las pesekusiones relijiozas i politikas, desde el siklo XVI, hasta los judios persekutados por los nazis, i los republikanos espanyoles durante La Gerra Sivil. De muestros dias eyos kontinuan a resivir imigrantes i refujiados del Medio Oriente i de La Afrika.
Eyos salvaron a 2500 judios, entre eyos Eric Schwam i su famiya. Estando en el kampo de refujiados, la madre de Eric organizo una biblioteka i su padre, doktor, lavoro en el ospital de maternidad en Elne. Despues ke pasaron a la Suissa, Eric fue plasado en una kaza de kreaturas por La Secours Suisse, ligada a La Red Cross, ke ayudava a salvar las kreaturas durante La Segunda Gerra Mundial. Despues de su salvasion, la famiya Schwam bivio fista 1950 en Chambron-sur-Lignon. Sus padres tornaron a sus sivdad de orijin Vienna, i Eric se fue a Lyon para estudiar farmasetika en la Universitad de Leon. En Lyon el enkontro a su mujer de orijin katolika i en 1956 tomo la nationalidad franseza.
En 1957, Eric empeso a lavorar komo farmasien i bivio en Lyon fista la fin de su vida. La parea no tuvo ijos i antes 10 anyos el i su mujer vinieron a vijitar Chambron para avlar de sus dezeos de deshar un montante de su skapital para eyos. Eric Schwam, murio el 25 disiembre 2020. Despues de tres semanas, la asistente de kultura de Chambron-sur-Lignon, Denise Vallet resivio un telefono de un notario lyones. El keria diskutir i anunsiar la donasion de mas de 2 miliones de Euros, de su kliente Eric Schwam. Este montante eskrito en el testamento de Schwam devia de uzarse spesialmente en los projektos de edukasion i de burses para los estudiantes. El montante fue muy satisfaktorio para este kazaliko de 2700 personas.
Chambron-sur-Lignon fue rekonosida “Justa entre las nasiones” por Yad va Shem Holokost Memorial.
