4 Mart 2021 Perşembe 06:26
vakko
vakko

DIDL de Estambol, el 21 de Febrero, Alhad a la ora 16:00

Silvyo OVADYA Judeo-Espanyol 2189 görüntüleme
17 Şubat 2021 Çarşamba

  Este anyo en el zoom. Es mijor ke nada. Todos muestros amigos estan lavorando para estas tres oras. Ya savemos ke en el mez de Marso, la Autoridad Nasionala ke se topa en Israel va organisar un DIDL Mundial, reelmente internasyonal i todos vamos a segir este zoom. En Estanbol el diya organizado va ser propojado por el zoom. Ma muestro amigo Henri esta lavorando para enrejistrarlo por el YouTube ke se va topar en muestro sit internet.

Eskrivyendo este artikolo un amigo de Israel me embiyo un mesaj de whatsapp dizyedome de ke no empleash i el FaceBook. Le dishe a Henri; avla kon este amigo i si puedesh organizar deke no!

   Estamos empesando a las 4 despues de midi (ora d’Estanbol). Ya savesh ke tenemos una ora de diferensya kon Israel; dos oras kon la mas grande partida de la Evropa i tres oras de diferensya kon la Inglatierra. Empesamos a las 8 de la demanyana en Nueva York i a las 7 de la demanyana en Dallas. Muestra ermana Rachel mos va dizir ke semos lokos. No tengo koraje para dizir la ora de Siatli.

   Despues de unos kuantos biervos de introduksion, Anna Eskenazi, Süzet Herman i Şeli Gaon mos van a kontar sovre las BODAS. Entre kada una tenemos dos kantikas. Una kantada por Liliana Benveniste i la segunda por el grupo NES. Despues es Seyfi İşman ke va prezentar su savor de boka: El Treno de la Vida. El kuento de Eliz Gatenyo va ser segido por el famozo teatro de Forti Barokas: “Los Alkulumbres”. Kreo ke vos va plazer. Es uno de los raros grupos ke azen su performansas en djudezmo.

   Hayim Behmuaras ke esta lavorando en todos los kampos mos va presentar una kantika de komida. I despues es la halis Edirneliya, İda Benromano, ke mos va gizar una komida de su sivdad ande nasyo; de Edirne.

Fani Ender i Nelly Barokas mos van azer konoser la Itahdut Yotsei Turkiya. Despues tenemos los dos djovenes ke van a transportar muestra lingua al 21en siglo: Kenan Kruz Çilli i Juan Sanchez. Es un plazer de oyir dos mansevos en muestra lingua. Es Gila Hassid ke mos va kantar "Nina", la kansyon ke eya eskrivyo por su madre i su padre. Kantika en djudezmo kon muzika grega, porke su famiya era de Salonik. Una maraviya. I vamos oyir a Dganit Daddo, otra manseva, eleva de Matilda Koen-Sarano. La kantika dalkavo va ser kantada por las Estreyikas d’Estanbol.

   Vos asperamos al zoom el 21 de Febrero a las 4 despues de midi. Si no savesh entrar al zoom vash a demandar a vuestro inyeto o inyeta ke tyene pasensya ke vos avra el zoom i sin tokar vash a mirar el komputer, el ipad o el telefon. Buenas semanas i buenos diyas.

 

Siz de yorumunuzu yapın

Tüm Yorumları Görün
Yorum Yapmak için üye girişi yapın!Yorum yapabilmek için üye girişi yapmanız gerekiyor...
Üye Girişi yapmak için Tıklayın

İLGİLİ HABERLER

İLGİNİZİ ÇEKEBİLİR