4 Mart 2021 Perşembe 07:23
vakko
vakko

Un personaje ke izo arebivir una lingua kaji muerta: Eliezer Ben-Yehuda, el padre del ebreo moderno

Metin DELEVİ Judeo-Espanyol 2199 görüntüleme
17 Şubat 2021 Çarşamba

La lingua ofisyal de Israel es el ebreo, ma asta la fin del siglo XIX, kaji dingunos no avlava el ebreo, no lo uzava en la vida de kada dia. Ma de otra parte, el ebreo, o komo se uza yamarlo, el Lashon Hakodesh, la lingua santa, se uzava solo para las orasyones i para estudyar la relijyon.

El uzo del ebreo moderno se atribuye a los esforsos de Eliezer Ben-Yehuda (en el orijin el se yamava Eliezer Yitzhak Perlman, i era nasido en el 7 de Enero de 1858 ). El istoryador Cecil Roth disho sovre Ben Yehuda: “Antes de Ben-Yehuda, los djudios podían avlar ebreo; despues de el lo avlaron". Ben-Yehuda, nasido en Luzhki, un kazaliko serka de Vilna Rusia, abandono su formasyon de estudyos tradisyonales por estudios mas sekulares a los 18 anyos, kuando se izo un joven adulto. Tambyen se izo un ardante sionisto.

Ben-Yehuda i su mujer Devora imigraron a la Palestina i yegaron a Yerushalayim en 1881. Devemos sinyalar ke antes de deshar Paris (ande Ben Yahuda estudio en la Universita de Sorbon), Ben-Yehuda aprovo uzar el ebreo para komunikar kon otros djudios i munchos pudyeron responderle grasyas a sus konosimyentos del ebreo bíbliko.

Marido mujer, los Ben-Yehudas engrandesyeron a sus ijos avlando solo ebreo. Ma en kada dia pasando,  Ben-Yehuda se topo ovligado a krear muevas palavras para munchos elementos ke no teniyan un ekivalante en el ebreo bibliko. (Devora Ben-Yehuda muryo de tuberkulosis poko antes de ke tres de sus ijos fueran hazinos en una epidemiya de difteriya. Unos kuantos anyos despues, Ben-Yehuda se kazo kon la ermana chika de Devora, Hemda).

Ben-Yehuda ensenyo el  ebreo en las eskolas, dyo konferensyas i emprimo jurnales en ebreo. Su lucha no fue syempre popular. La mayoriya de la povlasyon "ultraortodoksa" de Yerushalayim se opozaron firmamente al uzo del Lashon Hakodesh (la lingua santa) para la vida kotidyana.

El Komite de la Lingua Ebrea (mas despues el nombre fue trokado en la Akademia de la Lingua Ebrea) fue kreado por Ben-Yehuda komo otro medyo para promover el desvelopamyento del  ebreo. El Komite ayudo a topar o kreyar muevas palavras en akordo kon la nesesitad del mundo moderno, resolvyo difikultades idiomatikas i ayudo a Ben-Yehuda a krear su diksyonaryo de 17 volumes. Solo se publikaron sesh volumes antes de ke Ben-Yehuda muryera de tuberkulosis en Disiembre de 1922. Su espoza Hemda i su ijo, Ehud, kompletaron los volumes restantes.

Ke dizir, komo izo Ben Yehuda i sus apoyantes, devemos de ayudar, sostener i azer todo el nesesaryo para ke el muestro Judeo-Espanyol biva i poderemos desharlo a las jenerasyones futuras. Otro tanto para los voluntaryos del Judeo-Espanyol.

Siz de yorumunuzu yapın

Tüm Yorumları Görün
Yorum Yapmak için üye girişi yapın!Yorum yapabilmek için üye girişi yapmanız gerekiyor...
Üye Girişi yapmak için Tıklayın

İLGİLİ HABERLER

İLGİNİZİ ÇEKEBİLİR