16 Nisan 2021 Cuma 10:55
Beymen 5-20Nisan
Beymen 5-20Nisan

Sovre los Djudios d´Andirne

Silvyo OVADYA Judeo-Espanyol 2449 görüntüleme
11 Şubat 2021 Perşembe

   Alhad pasado el Göztepe Kültür organizo un zoom sovre los Djudios d’Andirne. Avia tres personas ke kontaron sus rekuerdos sovre Edirne. Los dos eran halis Edirnelis. I el treser un Edirneli ke se izo Edirneli a sus sesenta. Ken son los dos? El uno es Niso Kaneti ke bive en Israel. Ma reelmente se syente komo un Edirneli puro. I en kada okazyon, kon todas sus posibilitades aze un esforso para vijitar la sivdad ande nasyo. İda Benromano ke lavoramos endjuntos en diferentes kampos, empeso su ofisyo de dentista en esta sivdad i pratiko su ofisyo aya mas de sesh anyos. Paryo sus buchukas en Edirne i tyene munchas amigas en esta sivdad. Kuando puede, se va a Edirne ande una amiga. Los dos son “Halis Edirnelis”. I tyenen una buena memorya. Mos kontaron todo lo ke bivyeron en esta sivdad. La Eskola “Edirne Lisesi” es reelmente famoza i entre sus diplomados ay un alay de doktores, de dentistos/as, enjenyores, arkitektos, ekonomistos… Antes estas eskolas eran las mas renomadas en muestro payis. I avia un lise en Edirne, otro en Gaziantep …Oy ay syenes de lises en kada sivdad. I para pueder ser elevo en una universite renomada no es posivle komo al tyempo a los diplomados de estas eskolas. Puedeser unos kuantos reushen a entrar a estas universitas. Kale dizir ke Niso Kaneti fue enjenyor en elektronika en Israel. Mos kontaron sus chikez i sus manseves. Lo ke aziyan en enverano. El magazen de dulserias del padre de Niso i el magazen del padre de İda en Alipaşa. Ida mos dyo una lisyon sovre las komidas ke se giza (dainda) en las kazas de los Edirnelis. Muy enteresante el Sinyor Aydemir Ay ke es responsavle de los echos sovre el Turismo i Kultura mos konto ke estan publikando un livro sovre las komidas de los Djudios d’Andirne. I lo aprontaron en tres linguas; turko, inglez i judeo-espanyol. Es el Sentro Sefaradi d’Estanbol ke los ayudo para ke sea publikado en esta lingua (Forti Barokas izo la traduksyon; Karen i un poko yo izimos las koreksyones. Komo lo meldi unas kuantas vezes agora konosko un alay de komidas de los Edirnelis.)

   I verso la fin, el Presidente de la Munisipalidad tomo la palavra i mos konto ke avlo kon el famozo Rifat Mitrani kuando fue elijido. I le izo prometer ke va kedar a lo manko durante su presidensya en esta sivdad. I mos avlo de l’amistad ke tyene kon el i kon los Djudios.

   Koza muy enteresante! Komo todos los Djudios de esta sivdad se fueron sin mirar lo ke desharon detras. Es djusto ke bivyeron los Evenimyentos de Trakya en 1934, pedreron sus konfiensia por los Edirnelis, mizmo syertos por el payis ande nasyeron. Avia syertos merkaderes Djudios ke eran rikos ma la mas grande partida eran esnafes. Teniyan todo modo de botikas ma eran orozos. Es despues de este evenimyento ke fue realizado kon la influensa de los Nazistos i de los ke tenian la idea de Turkalizar todos los ofisyos i todos los postos. Ay sesh anyos ke me vo unas kuantas vezes a Edirne i konosko buen karar de djente, mizmo personas ke lavoran por el governo, para la polisia, para la munisipalidad… I reelmente todos son muy amavles kon mozotros. Reelmente no puedesh sintir un antisemitismo. Edirne ke es una sivdad reelmente ke tyene una istoria muy rika kon munchos monumentos istorikos. Oy en diya se topan en Edirne dos Djudios; un metropol Ortodoks ke fue embiyado por el Patrik Grego i ke organiza las orasyones de las iglesias Bulgaras, ke son Ortodoksas: la mas famosa se yama: Sveti Georgi. Ya savemos ke egziste el Konsul de la Gresia i el Konsul de la Bulgaria. Antes en el 1902 se topavan en el konsilio de la Munisipalidad de dodje personas, sesh Otomanos muzulmanos; un grego, un Italyano, un Bulgaro, un Ermeni (organizimos dos anyos antes una egzibisyon sovre los Ermenis d’Andirne sovre el livro publikado de Roy Arakelian, un doktor ke bive en Fransia i ke sus paryentes son orijinaryos de Edirne. Malorozamente un grupo ke devia de partisipar a la avyertura de la ekspozisyon no vinyeron  porke sus Patrik Mutafyan mos avia deshado la buena vida), i un djudio.

   No vos va kontar ke los Edirnelis organizavan komidas en el bodre de la Maritsa, i tyenen la uzansa de organizar piknikes trayendo las komidas de sus kazas. Las mujeres lavoraron bastante en esta epoka para gizar i para preparar en enverano todo modo de kozas para el invyerno.

    Vos konti solo unas kuantas kozikas sovre la reunyon realizada i los Edirnelis. Despues de la Korona va ser un grande plazer de ir a esta sivdad kon vozotros.

Siz de yorumunuzu yapın

Tüm Yorumları Görün
Yorum Yapmak için üye girişi yapın!Yorum yapabilmek için üye girişi yapmanız gerekiyor...
Üye Girişi yapmak için Tıklayın

İLGİLİ HABERLER

İLGİNİZİ ÇEKEBİLİR

GZ

TÜNELİN UCU

TÜNELİN UCU

MOZOTROS AİLESİ

MOZOTROS AİLESİ