17 Mayıs 2021 Pazartesi 02:55
Zen Poliklinik 1 nolu alan
Zen Poliklinik 1 nolu alan

“Minix” en Yel Değirmeni

Silvyo OVADYA Judeo-Espanyol 1723 görüntüleme
23 Ocak 2021 Cumartesi

En primero devo de dar syertas eksplikasyones sovre el biervo “Minix”. Ya savesh ke tenemos en muestra Konunidad una eskola empesando del kindergarden asta la fin del lise en Ulus. Los 30-35% de la populasyon de muestra komunidad mora en la partida Asiatika i dingun paryente no esta kontente i no kere embiyar sus kreaturas a las sesh de la demanyana a la eskola maternal. Es por esto ke avrimos (La direksyon de la Komunidad) en 2007 en la parte Asiatika una eskola para las kriaturas antes de la eskola primera. Esta eskola fue yamada “Minix”. Mizmo teniyamos klasas para las kriaturas de dos anyos ande vienen kon sus madres. Empesimos kon 3 elevos i kreo ke vimos asta 58. En el empesijo no aviya bastantes kriaturas ma despues la direksyon fue enkargada por syertos diridjentes de la Komunidad de Kadıköy-Caddebostan.

  No se kuantos de entre eyos se van despues a la eskola Djudia de Ulus; ma se ke una grande partida se van a  Ulus despues de la eskola primera. La razon es porke no es muy kolay para las kriaturas de sesh o syete anyos de alevantarsen a las sesh de la demanyana para ir a la eskola.  Mi suenyo era de formar una eskola primera kon kuatro klasas. Ma no se realiso. Puedeser un diya. Kinze anyos antes, el Mayor de Kadıköy mos telefono dizyendo ke este edifisyo ande se avriyo la semana pasada el Minix era alkilado a una kompanyia ke fabrikava tripas de bestias i kon lo ke produsia, toda la mahalle fediya la medra de las bestias. I mos disho ke van anular la permision de esta kompanyia. Era dos edifisyos. Dishimos ke deviyamos de restorar estos dos edifisyos. Ya savesh puedeser ke no es muy kolay de restorar un edifisyo istoriko ke no egziste. Kale presentar fotografias i un alay de kozas para ke sean siguros ke estamos refraguando la kopia del antiguo edifisyo. El arkitekto Hayim Beraha ke es muy enteresado en los edifisyos antiguos lavoro mas de dos anyos para realisar esta fragua. Tomando todas las permisyones legalmente. I empeso kon el primer ke egzistiya i eskapo kon el segundo ke fue enspirado de la eskola de la Aliansa de Ortaköy. Peno muncho. Turo kreo sesh o ocho mezes mas largo ke lo ke se aviya programado. Empleo los dokumentos ke fueron arekojidos por el Sinyor Anri Niyego ke es el eskrivano del livro sovre Haydarpasha kon el ayudo de Sami Yanni. “Ecole Communale Israelite-Haydarpasha” era el nombre de esta eskola, ma savemos de las letras embiyadas (entre el direktor de la Eskola i la Aliansa) ke era una eskola de la Aliansa ke salvo la vida de los Djudios Otomanos i ke mato la lingua Judeo-Espanyola. Ma la sivilizasyon kreo ke era mas emportante i agora estamos lavorando para arebivir muestra lingua.

  No es muy kolay de pueder restorar estos edifisyos. Kale finansar. I es un Haydarpashali ke estudyo en esta eskola ke fue el eroe de esta eskola; el Sinyor Levi  kon su ijo i kon su famiya. Reelmente izyeron una “Mitzva” muy emportante. I diya de djueves estavan muy kontentes i orgolyozos de ver esta eskola ke empeso a lavorar por el empesijo kon mas de vente kriaturas. Espero ke despues ke el virus va pasar; mas i mas kriaturas van a empesar a esta eskola maternel. Malorozamente esta avyertura se realizo kon pokas almas. Porke no era posivle de envitar syenes de personas. El Hahambaşı, el Presidente de muestra Komunidad İzak İbrahimzadeh, el vise presidente Moris Levi; el prezidente i syertos diridjentes de la Komunidad de Haydarpasha, el Rav Adoni, el prezidente de la eskola Ulus el Sinyor Aşkaner, la koordinatora de los estudyos, la Sinyora Röne Kaspi fueron prontos este diya. I las kriaturas mos kantaron unas kuantas kantikas. Yo reelmente estuve muy kontente de ser presente en este diya. Una otra vez kero rengrasyar el Sinyor Levi i los miembros de su famiya. De la otra vanda kreo rengrasyar el Arkitekto Hayim Beraha i los diridjentes de la Komunidad de Haydarpaşa.

 

Siz de yorumunuzu yapın

Tüm Yorumları Görün
Yorum Yapmak için üye girişi yapın!Yorum yapabilmek için üye girişi yapmanız gerekiyor...
Üye Girişi yapmak için Tıklayın

İLGİLİ HABERLER

İLGİNİZİ ÇEKEBİLİR

GZ

TÜNELİN UCU

TÜNELİN UCU

MOZOTROS AİLESİ

MOZOTROS AİLESİ