Ester Pando
Keridos Lectores
Kreygo ke no ay persona en la Turkia ke no konose la Ajanda Ece. Estos tefteres grandes i pretos vyenen del tyempo dalkavo del Imperio Otomano. Oy en diya ayinda kontinua la produksyon de las ajandas.
La kompanyia fue fondada en 1892 por Mehmet Sadık Kağıtçı en Beyazıt en Estambol i el nombre de la botika era Afitap. En 1910, Mehmet arreto la vendida de papeleria, i empeso a produsir Ajandas i en kurto tyempo fue la mas populara ajanda en el pais. El senso de estas ajandas eran “akodrarse i azer akodrar".
La ajanda kontinuo a salir todo el tyempo, mizmo tyempos de guerra tambien. Por esto es ke a Mehmet, lo yamaron Mehmet Sadık Kağıtçı.
El nombre Ece dizen ke es metido de parte de Atatürk a la ermoza del mundo ke fue eskojida akel anyo Keriman Halis. Ma la verdad la disheron la famiya ke egziste oy en diya, el nombre Ece tyene un rekodro muy triste. El nono, teniya tres ijas i dos ijos. De los ijos el mas grande ke se yamava Ahmet se fue a la Romaniya para pueder devinir piloto i en estando aya se namoro de una manseva ke se yamava Ece. Malorozamente no pudyeron aunarsen i Ahmet partyo de la Romanya a İran i se pyedro i mas no uvo novelas de el nunka.
Las ajandas oy en diya son echas kon esforsos de personas i no son produksiyon seria en fabrika. Por esto ayinda tyenen partikolaridad.
La famiya ayinda dizen ke la kompanyia Ece es komo una famiya, i es mas ke una marka. Lo mas emportante dizen ke kon sus amarguras, kon sus alegrias, kon su djustedad i kon sus yerros, se alargo fina la sinkena jenerasyon, i son una famiya de Estambol.
