Las tres personas detras la vaksina COVID 19

Dora NİYEGO Judeo-Espanyol
25 Kasım 2020 Çarşamba

Un judyo de Salonika, Albert Bourla, diretor egzekutivo de Pfizer, anonso ke toparon la vaksina COVID-19 kon 90 por syen de efektividad. Los fondadores de la vaksina son dos famiyas ke emigraron de Turkiya a Alemanya, Uğur Şahin i su mujer Özlem Türeci. El lavóro para los estudyos de la vaksina kontra el virus korona empeso en Marso. Albert Bourla se desido de lavorar kon BioNTech por las investigasyones de la vaksina COVID-19. Pfizer amostro sus kapasidades en produkyon i investigasyon, BioNTech lavoro en el kampo de la siensya. La karakterístika de la vaksina es ke fue aparejada kon una teknolojiya ke no se aviya provado fin agora.

Albert Bourla, ke avanso en su karyera profesyonal en Pfizer durante 25 anyos i se konvertyo en direktor egzekutivo de la kompanyia en 2019, nasyo en Salonika, la segunda grande sivdad de Gresya. Su famiya ke era de klasa medya sovrebivyo la okupasyon nazi i el Olokosto. La famiya es de los sefardis ke se refujyeron al Imperyo Otomano kuando fueron ekspulsados de Espanya. Una partida de la famiya se establesieron en Salonika, otra partida se fueron a Estanbol. Albert Bourla es paryente de los Burla Brothers de Estanbol.

Albert Bourla, estudyo la medisina veterinarya en la universidad. Lavoro komo gia en la Evropa los enveranos. Despues ke eskapo su doktorado en la Universidad Aristo, Bourla empeso a lavorar en el departamento de la salud de animales en Pfizer en 1993 i bivyo kon su famiya en ocho sivdades en sinko payizes diferentes. En 2014, dirijo la divizyon de vaksinasyon i de kanser de Pfizer en Manhattan. En 2016, se izo prezidente de Pfizer Innovative Healthcare Group. En 2019, se izo el CEO de la kompanyia.

Komo es prediktivo, Bourla empeso la produksyon de la mueva vaksina sin tomar la konfirmasyon de FDA. La kompanyia va produsir 50 milyones de dozes de la vaksina fina Desembre de 2020, i 1.300 milyones fin Desembre de 2021. Bourla disho ke estan en una relasyon muy serkana kon sŞahin i Türeci, desde ke se ambezo ke son emigrantes de dos payizes vizinos.

Los sientifikos Uğur Şahin i Özlem Türeci dedikaron sus vidas a la onkolojiya i a las hazinuras enfeksiyozas. Durante anyos, fueron pioneros en los tratamyentos immunoterapiya.  Kuando empeso la epidemiya del virus korona, el kuplo Şahin-Türeci developaron la primera vaksina efikas kontra el virus korona grasyas a sus investigasyon pionera en el kampo de la modifikasyon del kodigo jenetiko. Kuando empeso a oyersen las primeras muertes, yamaron todos los parteneres de la kompanyia, a kompatir kon esta epidemiya ke aviya empesado a salir afuera de kontrol. Özlem Türeci, syendo komo direktor mediko, djugo grande rolo en el developamyento de la vaksina.

Şahin, de 55 anyos, i Türeci, de 53, fondaron BioNTech en 2008 en Mainz, Alemanya. En el anyo 2001, los dos medikos fondaron la kampanyia Ganymed Pharmaceuticals, ke developo los antikuerpos para kombatir el kanser, i lo vendyeron por 1.400 milyones de dolares en el anyo 2016. Los dos sientifikos ke son unas de las 100 mas rikas personas de Alemanya, son filantropos i personas ke dedikaron sus vida a la siensya. La valor de BioNTech, ande lavora 800 personas, es 21.000 milyones de dolares.

Şahin nasyo en İskenderun, i kuando teniya kuatro anyos, se fue kon su famiya a la sivdad Kolonya ande el padre empeso a lavorar en la fabrika Ford. Se konosyeron kon Türeci, ke es la ija de un mediko turko, kuando estavan azyendo karyera akademika en kanser. El diya de sus boda, antes i despues de la seremoniya, estuvyeron azyendo investigasyones en el laboratoryo. El kuple tyenen una ija de katorze anyos.

 

 

 

 

 

 

Siz de yorumunuzu yapın

Tüm Yorumları Görün