25 Kasım 2020 Çarşamba 13:09

CARMEN HERRERA: “NO AY EDAD PARA REUSHIR”

Süzet FRANSEZ Judeo-Espanyol 2103 görüntüleme
18 Kasım 2020 Çarşamba

Nasida en 1915, en Havana Kuba, en una famiya intelektual. Su padre era editor del jurnal El Mundo i su madre jurnalista del mismo jurnal. Herrera, desde su chikes era muy interesada en la pintura i avia tomado lisiones partikulares. En su manseves, eya kontinuo a estudiar el arte en Paris i viajo a Roma i Berlin. A su retorno a Havana, estudio arkitektura en una universita Kubana. En estos anyos se enkontro kon su marido, un judio de Bronx, ke estava de pasaje en Havana, Jesse Loewental, un profesor de literatura, un linguista ke konosia 6 linguas. Se kazaron en 1939 i se instalaron en Nueva York donde su marido bivia.

En Nueva York, eya se uniso kon un grupo de artistos abstraktos. Eya konta ke, en esta sivdad yena de bisikletas, avia una atmosfera  artistika, i uno sentia ke estava en medio de algo istoriko, orijinal, enerjiko, revolusyonario i muy eksitante. Durante munchos anyos, Herrera, izo ekspozisyones sin vender una sola ovra. La primera ekspozisyon personal fue en Nueva York, en 1956, en una galeria Sudamerikana. Eya i su marido eran entornados de amigos bohemios, i eran muy satisfechos de sus relasiones. Ma eya no pudo deskuvrir su identidad artistika i se desidieron de instalarsen en Paris, despues de la segunda gerra mundial, en 1948.

 En lavorando en Paris, Herrera enkontro su vokasyon i disho ke kuando estava en Nueva York, el tipo de arte ke estava aziendo, “abstraksyon  jeometrika” no era akseptable en akeya perioda. Las galerias no  estavan interesadas a ekspozar sus ovras. El direktor del muzeo de Barrio en Nueva York konta ke, Carmen  no pintava paizajes kubanos, ni flores tropikales komo se asperava de eya. Era muy difisil de dijerar su arte, i mesmo si avia galerias ke les plazia su arte, no la akseptavan porke era mujer. A parte de partisipar a las ekspozisiones kon artistas Latin Amerikanas, en los anyos 1990 en Nueva York, eya aspero fista el anyo 2009 para resivir una invitasion de la galeria Ikon Gallery, en Birmingham i ekspozo por la primera vez en Evropa. Despues de esta ekspozision, un kritiko de arte eskrivio por eya “la deskuvierta de este anyo, de este dekado”. Las invitasyones kontinuaron i en 2016, kuando tenia 100 anyos, izo una ekspozision “solo” en Whitney Museum, en Nueva York, ke la klaso entre los  artistas mundiales, los mas famozos.

Desde los anyos 1950- 60, eya siempre lavoro kon dos kolores. Kuando le demandan deke pinta siempre en dos kolores, eya dize: “todas las kolores son iguales para mi, inkluido el blanko i el preto; kuando metes dos kolores endjuntos en un konteksto de formas minimales i diviziones i una linya derecha,  obtienes una sensasion unika. Esto me enkanta”. Un kolektor de arte i admirador de Herrera disho “Ay una  inkreible simplisida en su ovra, sin ser simple”.

Carmen Herrera  konta ke tuvo una vida maraviyoza. Bivio kon una sensasion infinita de liberta en Paris, donde artistas de todas las partes del mundo venian. No se sintia limitada en ningun subjekto. Kuando le demandan si fue frustrada ke no pudo vender una sola ovra fista los 90 anyos, eya dize “ser inyorada por el mundo es una forma de liberasion mental. En mi vida no sinti la obligasion de plazer a ningunos”. A su grande surpresa, la realizasyon de la vendidad de su ovra kon una soma de 7 shifros, le permetio de azer sus skulpturas. A la edad de 90 anyos, la djustisia kozmika onoro esta artista ke paso invizible durante el siklo 20, komo munchas mujeres artistas. Malgrado su dezeo profundo de tener famiya, eya no tuvo ijos.  Herrera, oy tiene 105 anyos i dize, “mis pinturas son mi famiya, me azen sintir biva, sinon me iva durmir el dia entero”.

El solo regreto de Carmen es ke su marido Jesse Lowenthal, ombre spesial, ke empeso a estudiar el grego antiguo a los 95 anyos, para meldar Homerus en su lingua original, muryo a 98 anyos, sin poder ver el sukseso de su mujer.

Siz de yorumunuzu yapın

Tüm Yorumları Görün
Yorum Yapmak için üye girişi yapın!Yorum yapabilmek için üye girişi yapmanız gerekiyor...
Üye Girişi yapmak için Tıklayın

İLGİLİ HABERLER

İLGİNİZİ ÇEKEBİLİR

Mozotros Ailesi- İrvin Mandel

Mozotros Ailesi- İrvin Mandel

Tünelin Ucu-İzel ROZENTAL

Tünelin Ucu-İzel ROZENTAL