28 Kasım 2020 Cumartesi 23:25

1973 La gerra de Kipur

Judeo-Espanyol 686 görüntüleme
28 Ekim 2020 Çarşamba

Ester Pando

 

En 1970 izimos Aliya kon mis padres. Teniyamos muestra kaza i mi padre avyo su echo de tekstil i yo me fui a una eskola enterna ke se yamava "pnimiya" en Ebreo. Grasyas al "sohnut aliyat anoar", ke era una fondasyon para los mansevos ke kijieron azer Aliya, kada moed, i en vezes vyernes i shabat saliyamos a kaza.

Era el anyo 1973, diya de kipur a las 14.00 de midi me topi sola en kaza, mi madre i mi gramama estavan ande mi tante, i mi padre en la sinagoga por siguro. Enduna empeso una alarma muy fuerte en la sivdad ke me espanti muncho, i sali a la kaye koryendo me fui ande mi tante en 10 puntos ke normalmente ni en medya ora se puediya ir.

En kada kanton de las kalejas se estavan arekojyendo los soldados i las soldadas, syertos vistidos sivil. En rezumen bivimos una panika muy grande i entendimos ke empesso gerra entre Israel i los paizes arabos.

Lo mas de los ombres se fueron para gerrear i mozos los siviles, lo mas mujeres kedimos en la sivdad. De suyo la populasyon, sin panika se ekipo kon una ekilibra muy perfekta. Mi padre kada demanyana i tadre arekojiya djente kon otomobil para yevar de Batyam a Tel Aviv, i la tadre lo mismo munchas vezes. 

I yo empesi a distribuir letras de los soldados a sus famiyas sin asansor por ke era defendido. En suplemento arekojiyamos de las kazas munchos materyales ke nesesitavan los soldados.

Por siguro ke las eskolas estavan serradas i entremiyentres la gerra se estava alargando i la tristeza estava pujando achakes de los haberes ke estavamos resiviendo de las frontyeras.

A todo mos auzimos, los alarmes de diya u a medya noche, kalia korrer a los abrigos ke mi granmama no vinia, ma la koza ke no mos puediamos auzar era los haberes negros de los soldados.

Despues de un mez, se avrio muestra eskola ma no para estudiar, era para arekojer narandjas komo portokales, mandalinas i limones para la eksportasyon porke los lavorantes Arabos no teniyan permision de lavorar.

La gerra turo un tyempo largo.

A mi idea los Israelyanos son muy rezistentes i sistematikos spesialmente en estas situasyones.

Esta eksperyensa syendo ke era muy manseva, me ambezo ke la gerra es una trajedia muy grande.

Kale entender muy bien i azer empatia a los puevlos de los paizes ke estan gerreyando, i esto ogurando pas i amor al mundo entero.

Munchas grasyas a todos los lektores

 

 

Siz de yorumunuzu yapın

Tüm Yorumları Görün
Yorum Yapmak için üye girişi yapın!Yorum yapabilmek için üye girişi yapmanız gerekiyor...
Üye Girişi yapmak için Tıklayın

İLGİLİ HABERLER

İLGİNİZİ ÇEKEBİLİR

Mozotros Ailesi-İrvin MANDEL

Mozotros Ailesi-İrvin MANDEL

Tünelin Ucu-İzel ROZENTAL

Tünelin Ucu-İzel ROZENTAL