NOAH I EL DILUVIO

Eliz GATENYO Judeo-Espanyol
23 Ekim 2020 Cuma

No tengo dinguna pretansyon en el saverisyo de los sujetos de las relijyones en jeneral, ni tampoko en la muestra, partikularmente. Ma devo dizir ke tengo un entereso enverso siertas eksplikasyones i komentaryos ke se tratan en la Tora.

Agora vos kero avlar de la perasha de esta semana. Komo lo savemos, las perashas mos kontan las leyendas de muestra istorya, i kitan de estas leyendas ensenyamyentos a toda la umanita. Yo penso ke la Tora tiene una valor universala.

La perasha de esta semana se yama: Noah. Es konsakrada al diluvyo ke konosemos. 

Del empesijo de la kreasyon del mundo asta Noah, paso muncho tiempo. El mundo se aviya inchido de idolatriya, de immoralita i de ladronisyo. Por esta razon kijo El Dio kastigar a todos los moradores del mundo, kon un grande diluvyo. Ma komo el Kriyador teniya muncha estima por Noah, ke era una persona muy djusta, kijo salvarlos a el i su famiya. Le disho de fraguar una nave, i kon eyos, meter aryentro un par de todo jenero de bestias tanbien.   

 Sigun la leyenda este diluvyo turo unos 150 diyas. Despues ke la paloma trusho una rama de azituna, la nave se pozo ensima del monte Ararat.  

Despues ke abasharon Noah, su famiya i todas las bestias de la nave, fue formada una mueva umanita. El Dio preskrivyo syete komandamientos para la mueva epoka ke formaron mas despues la baza de los diyes komandamientos de Moshe. 

Estos syete komandamientos son:

-       Abandonar la idolatriya

-       Defensya de adultaryo

-       Defensya de ladronisyo

-       Defensya de kontrariar al Dio

-       No matar

-       No komer karne kruda

-       Formar un sistem de leyes

Esto fue el empesijo de una mueva sosyeta para ayegar a la sivilizasyon, a ampesar de muevo a todo, a ambezar a lavorar, a kerer bien al otro. 

La konkluzyon ke yo personalmente esto kitando de esto todo, es ke devemos ampesar siempre de muevo, sin kansarmos, para pueder si no alkansar, a lo manko aserkar de la perfeksyon. 

Antes de eskapar, kero avrir una paranteza para azer una analojiya kon estos diyas de pandemiya ke estamos pasando.  Kreyo ke despues ke va eskapar esta Corona, munchas kozas van a trokar en muestras vidas. Mos vamos a render kuento de la valor de la vida en ambezandomos a ser orozos kon chikas kozas. Vamos a entender ke la rikeza no es muy valoroza, ke la afeksyon de famiya es muy muy emportante. Komo lo bivimos agora, ke vemos a los ijos i inyetos solo por telefon. Ke no los puedemos abrasar ni afishugar. Vamos a entender la emportansa de ayudar a los menesterozos, seya de salud seya pekunario. I lo mas emportante es ke entendimos la valor de lo ke tenemos i azer loores al Todo Poderozo. 

En rezumen, la skala de valores va trokar. 

 

Siz de yorumunuzu yapın

Tüm Yorumları Görün