28 Ekim 2021 Perşembe 22:11
Op Dr Mücteba Gündüz

EL SENYOR DE LOS BIERVOS

Eliz GATENYO Judeo-Espanyol 1685 görüntüleme
30 Eylül 2020 Çarşamba

Alberto Manguel es un grande entelektual ke fue ovligado de deshar la Fransia ande estava biviendo desde munchos anyos para instalarse en Portugal, por razones fiskalas. Tiene una biblioteka de mas de 30.000 livros. El kreo su vida sovre sus livros. Resivio munchos premios. En lo ke era mansevo meldava livros a Manuel Luis Borgues, un eskrivano famozo ke era siego. Eskrivio livros sovre lektura i linguistika, komo “La istorya de meldar”, “Memorias de meldar”, “Biblioteka en denoche”, “La sivdad de los biervos”. 

Alberto nasio en Buenos Aires de padre i madre judios en 1948. Su padre Pablo era el Ambasador de Argentina en Israel. De sorte ke sus primeros anyos los bivyo en Israel. 

Tuvo una chikes muy espesiyala. Su madre i su padre estavan muy okupados kon la diplomasiya. Por esto teniya una dadá de Chekoslovakia ke avlava el aleman i el inglez. 

En un reportaje ke izieron kon el, durante un festival de literatura, en Kingstone Kanada,  konto sovre su chikes ke a mozotros mos parese triste ma para el era muy oroza. Manguel konto:

Bivi kon esta dadá durante los siete anyos primeros de mi vida. Fue komo tener padre i madre en uno, solo para mi. Tengo dos ermanos. Nasyeron en Israel i eyos fueron engrandesidos kon dadás.  Era un akordo estranyo de mis paryentes. Dingunos de mozotros no avlavamos la mizma lingua. Mi papa i mi mama saviyan solo el espanyol i un poko de fransez. Mozotros los ermanos saviyamos el ingles i el aleman. De sorte ke no podiyamos komunikar kon muestros paryentes ma ya mos akordavamos kon mis ermanos. Me akodro ke diziya a mis paryentes en vezes “buenos diyas” en espanyol i esto era todo. I en 1955, despues ke kayo Peron, tornimos a la Argentina. Aya fue ke mos ambezimos el espanyol i pudimos avlar kon muestros paryentes. Komo vos dishe estava muy orozo. Imajinavos una chikes ande tenesh una persona para vozotros solo por 24 oras en 24 oras, ke entiende ke amash los livros i vos permete ke merkesh el livro ke keresh i vos trata komo un adulto. Al lugar de mis paryentes yo teniya mis livros, al lugar de una patriya yo teniya mis livros, al lugar de un puevlo o una relijyon yo teniya mis livros.”

Alberto Manguel en 1975 se kazo kon Pauline Ann Brewer i tuvieron 2 ijas i un ijo. En el anyo 1986 divorsaron. Despues ampeso a bivir kon su partener, el sinyor Craig Stephenson i se enstalaron en Fransia. 

En el reportaje le demandaron lo ke sintiya por su relijion judiya. Manguel respondyo: No siento nada. Kuando biviya en Israel ni ke saviya ke so judio. No fiestavamos las fiestas judiyas. Kuando tornimos a Arjentina vide ke mi nona asendiya las kandelas de Shabat ma no saviya la razon.”

 El se dize un judio sin judaismo.

Alberto Manguel es siempre elegante, tiene ojos blus i una barva ermoza. Viyaja muncho. Es Gay, Judio, nasido en Argentina, sitizano del Kanada, rezidente en Tahiti, Londra i Fransya en kurto un “Sivdadino del Mundo”. 

 

Siz de yorumunuzu yapın

Tüm Yorumları Görün
Yorum Yapmak için üye girişi yapın!Yorum yapabilmek için üye girişi yapmanız gerekiyor...
Üye Girişi yapmak için Tıklayın

İLGİLİ HABERLER

İLGİNİZİ ÇEKEBİLİR

Şalom TV GZ

MOZOTROS AİLESİ - İrvin Mandel

MOZOTROS AİLESİ - İrvin Mandel

TÜNELİN UCU - İzel Rozental

TÜNELİN UCU - İzel Rozental