21 Eylül 2020 Pazartesi 16:12

Mas se troka, mas es la mizma koza

Judeo-Espanyol 2431 görüntüleme
12 Ağustos 2020 Çarşamba

Haymi Behar

 

Es siguro ke el anyo 2020 es muy diferente para los ke bivyeron eventos istorikos del siglo pasado, komo gerras del mundo, famines, golpes de estado i los eventos de 6-7 Septembre.  Por munchas razones este anyo de 2020 es el empesijo del futuro. “El muevo normal”, komo les plaze dizir a munchos, es karakterizada por una gerra kontra un enemigo invisible kon maskas i dezenfektantes i muncha kolonya. 

 

Esto es el anyo kuando los mansevos empesaron por la primera vez a entender lo ke es ser viejos. Kedar en kaza la mas parte del diya i las noches de Shabat. Ver i avlar kon los amigos solo por el telefon. Espantarse de aferrar la grip. Dar mas tiempo a pensar sovre la vida i las memoryas en lugar de krear mas muevas memorias. El enverano esta pasando mas kalmo i kon mas distansia sosial aparte de un lugar: el bodre de mar. Kuando la djente esta entrando en la mar, se estan olvidando de la Korona. Esto para mi es muy normal porke kada uno tenemos menester de sintir ke semos dayinda bivos, i ke malgrado todo, la vida kontinua. Para mi, el lugar ande me si-ento siguro i bivo es el klub de Burgaz. Kuando entro en el klub pishin esto kitando la maska. Porke aya no entra la Korona! Este virus negro mazal no lo estamos tomando aryento del klub porke la Korona no pago el aidat! Ademas, no es ni miembro de muestro klub! 

“Es por esto ke kon muncho kalma i alegriya kitamos las maskas kuando entramos al klub komo entramos a muestra kaza. Kuando keremos tomar sol, kon un poko de prudensiya deshamos un metro i medio entre las siyas pero kualo puédemos azer hanumikas i senyores, estamos gritando un poko mas para avlar de una meza a la otra para kontar lo ke mos ambezimos a gizar kedando 3 mezes en kaza. Pero kuando diskutamos bnadando en la mar maraviyoza de Marmara, puedemos estar manko de dos metros porke la korona no save nadar. 

 

Munchas kozas trokaron en las islas este anyo; el fayton no egziste mas i los kavayos ya no estan. A mi me mankan mucho los kavayos ke veníyan a komer las plantas delantre de mi kaza las noches i a los sonidos de los kavayos, las kampanas de los faytones, afilu la golor de pipi. 

 

Komo dizen los fransezes, “plus ça change plus c’est la même chose” mas se troka, mas es la mizma koza. 

 

 

Siz de yorumunuzu yapın

Tüm Yorumları Görün
Yorum Yapmak için üye girişi yapın!Yorum yapabilmek için üye girişi yapmanız gerekiyor...
Üye Girişi yapmak için Tıklayın

İLGİLİ HABERLER

İLGİNİZİ ÇEKEBİLİR

GS2

Tünelin Ucu İzel Rozental

Tünelin Ucu İzel Rozental