El Judeo-Espanyol i los Hokkabazes en el Imperio Otomano

Silvyo OVADYA Judeo-Espanyol
28 Temmuz 2020 Salı

Kada diya un muevo video en el YouTube sovre el Ladino / Djudeo-espanyol, Djudezmo. Ay un tyempo ke vos puedo dizir ke muestra lingua se esta enfloresyendo. No se de ke, ma kon la Korona todos los ke konosen muestra lingua empesaron a produsir diferentas kozas. Youtubes, melodias, kantikas i un alay de kozas. No ay un diya ke no veo un mesaje en el whatsapp sovre esta kultura. Ke alegriya de pueder ver esto todo. Ya vos dishe ke tenemos dos grupos de whatsapp. I un grande entereso. Vos avia kontado ke de vez en kuando esto resivyendo mas de 200 mesajes al diya. Esto deve de mostrar lo ke puedemos azer. Kreo ke en serka tyempo vamos a pueder realizar munchas kozas. Kero rengrasyar a todos los miembros de los grupos. Kada diya estamos deskuvriyendo unos kuantos biervos. 

Vos kero avlar sovre los Jonglores ke vinyeron de la Espanya. Sus doveres era de divertir o de azer pasar buen tyempo a los reyes, a los nobles i al puevlo. En estos siglos en la Espanya los illuzyonistos, los ke aziyan djugar kuklas i los bayladores o maskaras formavan el lavoro de Juglares (huglares) i a este arte Jugleria (hugleriya). A estos djugos se dava el nombre de jock vas (hok baz) un nombre muy serka al “hokkabaz” de la lingua turka. En la istorya de los Espanyoles mos ambezamos ke los Kristyanos preferavan pasar el tyempo kon los jonglores Djudios i Muzulmanos al lugar de rogar al Dyo en las iglesias noche entera. Estos hokkabazes kuando vinyeron al Imperio Otomano, empesaron por azer divertir la djente azyendo syertos movimyentos de djambazlik porke no konosian la lingua del payis. Mizmo en la istoria de los Bizantinos se avla de los Hokkabazes djudios. Si estudyash esta tradisyon es muy enteresante de ver ke los Djudios son los pionaryos de este arte. Sovre este sujeto la mas ancha bushkidad es el lavoro de Elena Romero. Un livro sovre el arte de teatro en los Balkanes. Dizen ke los mijores Hokkabazes son los Otomanos, los otomanos Djudios orijinarios de la Espanya. En este ofisyo la lingua es muy  emportante. Emportante komo los movimyentos. Ma kalia ke se ambezen la lingua del payis para lavorar en avlando.

Vyendo estos artistos en la shena mos ambezamos ke no son solo hokkabazes, savian azer djugar kuklas i un alay de djugos de mano. En syertos livros esta eskrito ke estos hokkabazes i jonglores fueros eskomunikados. Ma ay grupos anchos ke organizaron todo modo de djugos en el Imperio Otomano.

Bushkando este sujeto en el internet veygo ke los bushkadores sovre este sujeto tyenen la mizma alkunya: “ Yaycıoğlu”: El artikolo se yama: Geçmişten günümüze Türkiye’de çok kültürlü Melez Sefardi tiyatrosu – Mukadder Yaycıoğlu    

Si vos enteresash en este sujeto vos konsejo de meldar el artikolo sitado.

Siz de yorumunuzu yapın

Tüm Yorumları Görün