23 Eylül 2020 Çarşamba 20:05

Potpuri

Eliz GATENYO Judeo-Espanyol 1536 görüntüleme
28 Temmuz 2020 Salı

*Esta enveranada esta pasando en la solombra de la Corona. Mos estamos akavidando en tomando al menos las 3 prekosyones ke savemos: taparmos la kara kon maskas, meter distansya entre la djente i la limpyeza.

*Por modo de estas akavidansas no puedemos toparmos muncho kon los amigos, ir a komer libremente en los restoranes, no puedemos mizmo entrar a la mar o a las pisinas. El Dio ke mos ayude.

*Este anyo aparte de unos kuantos diyas de munchas kalores, tenemos un tiempo mas fresko. Los amatores de la mar no estan kontentes ama los ke no pueden suportar las kalores (koma mi) estan orozos.

*En los motores ke transportan los moradores entre las islas i la sivdad, vemos ke todos se asentan kon distansya i kon maskas. Kada anyo se undiyan las islas de los ke viniyan de otros lugares i de turistos. Este anyo no ay akeya djentorya. Estamos mas kalmos.

*Vineremos al problem de transporto en las islas. Alevantaron los faytones dizyendo ke kale protejar los kavayos. Ya eskrivi esta kestion la semana pasada ma dainda no se topo dinguna solusyon. Ke azen los ke moran en las alturas o leshos?

Un poko de aktualidad:

*El Rav Mendy izo un reportaje kon el papaz ermeni el Sr. Drtad Uzunyan. Estava muy enteresante. Eyos mizmo estuvieron muy kontentes de parte a parte. Vos rekomendo de mirarlo si lo topash.

*El Papa Francis izo una deklarasyon a todas las iglesias katolikas del mundo. Ya savesh ke en los kristyanos tienen el uzo de ir ande el papaz i “konfesar pekados”. Ansina kreyen ke se les perdona el pekado. El Papa disho ke si  alguno vino ande el papaz i konfesa algun pekado ke izo, komo los aktos de abuzos kontra las kriyaturas, mujeres o ombres, kale ke los papazes denonsan estas personas a la polisiya, malgrado ke tienen djura de guadrar sus sekretos.

*Meldi un artikolo muy enteresante. Un kuple kazado durante anyos largos no tuvieron kriyaturas. Se fueron a los doktores, se suanyaron i a la fin les vino el buen haber ke ya pudyeron obtenir unos kuantos embriyones. El kuple disho mozotros no keremos tener buchukes o munchas kriyaturas en mizmo tiempo por modo ke no tenemos la situasyon finansiera, i es muncha pena. El doktor les disho, si keresh puedemos konjelar los otros i el uno puedemos meter en la tripa de la madre. El kuple aksepto. Les nasyo una ijika saludoza. Kuando la ijika  tuvo 3 anyos se fueron ande el doktor i disheron ke keren otra una kriyatura. Okey disho el doktor. Kitaron el otro embriyo i lo metyeron a la tripa de la madre i les nasyo otra una kriyatura. Agora lo enteresante es ke: Estas kriyaturas nasyeron kon 3 anyos de diferensya ma en realidad son buchukes. Por ke fueron “rekoltados” en el mizmo punto.  Muy estranyo, no?

Esta semana kije aprovar a eskrivir “por aki, por aya” por ke la djente ya estan enfasyados i no tienen pasensya de meldar tekstos largos.

Siz de yorumunuzu yapın

Tüm Yorumları Görün
Yorum Yapmak için üye girişi yapın!Yorum yapabilmek için üye girişi yapmanız gerekiyor...
Üye Girişi yapmak için Tıklayın

İLGİLİ HABERLER

İLGİNİZİ ÇEKEBİLİR