Vitesh alguna vez ombres ke se pelean en una famiya Keridos Lektores?
Los ke se pelean son las mujeres de la famiya! Al lugar de ser feminista, mos komportaremos en primero de mujer a mujer de una manera sivilizada, kon respekto i kon kerensya…
En la famiya el esfuegro kon la ermuera se pasan muy buenos porke se keren bien. Los kunyados, los esfuegros, los novios beven raki endjuntos, djugan tavli… Las ke se pelean son las kosfuegras, las kunyadas, las novyas, las ermanas del padre… Mos inyervamos kuando los ombres estan en el kafe bevyendo chay, las mujeres en los kampos estan lavorando…
La igualdad es un tema importante en lakuala insisten las mujeres. En ke sujeto la igualdad, ande esta la igualdad?
Las mujeres keren ke los ombres lavoren i en kaza. Komo? Los ombres ya estan vinyendo del echo muy kansados… Si la mujer esta lavorando, siguramente ke el ombre va ayudarla i en los echos de kaza. Si ay igualdad, kale i ke las mujeres partisipen a los gastes de kaza i a otras kozas komo pagar las fakturas…
Mozos no semos iguales kon los ombres, no puedemos ser. Mozos semos “SUPERIORES” a los ombres. Deke? Porke la natura mos emprezento la karakteristika la mas manyifika, la mas grande ke es: “Kriar Persona”…
“Erich Fromm” dize: “La superioridad de la mujer se asimila en su kapachidad de tener ijos, en su kapachidad de krear umanos”. Komo mujer devemos de tener preokupasyones diferentes.
Sintiremos i saveremos la ermozura de la mujer i selebraremos esta ermozura kon entuziazmo.
Si tenemos menester de lavorar, lavoraremos despues ke los ijos se engrandesen… Despues de los 40, se puede realizar munchas kozas komo los ideales ke tenemos.
Yo penso, ke no ay feminizmo. Ay ombres brutales, ombres negros, ombres egoistos, ombres sin edukasyon, ombres ke no entienden la mujer, la vida…
Lo ke devemos de azer es rezistir a todo modo de eksploitasyon, penar para ke todas las mujeres se ambezen a meldar i eskrivir. Sintiremos i saveremos la ermozura de la mujer i selebraremos esta ermozura kon entuziazmo.
En 17.06.1957 en el jurnal “New York Times” salyo un avizo ande estava eskrito: “Mi mujer es, i mi mujer, i mi infirmiera, i mi ayudente, i mi konsejera, i mi madre, mi padre, mi ermana, mi mosa, mi kerida, mi namorada… Esto agradesyendo i remersiando al Dyo, ke me dyo una mujer este modo!
