3 Ağustos 2020 Pazartesi 14:54

Ke ay en la parte obskura de la luna? 

Judeo-Espanyol 879 görüntüleme
8 Temmuz 2020 Çarşamba

Haymi Behar

 

La noche de Alhad despues de las mueve i medya estuve asentado en el klub de Burgaz al bodre de mar, esperando la luna en kinze ke suva. No aviya ni una alma en este lugar ermozo, ande unas kuantas oras antes estava yena de djente gozandosen del diya de konje tomando sol i nadando en la mar. 

 

Kuando ya yego la luna yena tan grande i briyando komo una estreya jigante sovre Heybeliada, me demandi esta pregunta: Ke ay en la parte obskura de la luna? 

 

La luna parese muncho a una persona. Briyante en una parte i obskura en la otra. Ay djente ke paresen muy alegre de afuera para eskonder sus anksiedades o tristezas interyores. 

 

Kada uno tiyene unos pensamientos en su kavesa i su korason ke partajan kon muy poka djente. Todas las kozas ke pasamoa en el kamino de la vida mos deshan sentimientos ke yevamoz en muestra alma fina la fin de muestra vida. Alegrias, remorsos, emosyones, amores, kada sikatriz ke tenemos mos da forma. Asi es komo kresemos i evoluamos.

 

Ay munchas vezes ke mos parese ke el mundo djira en muestro alrededor. Pero ni a la luna, ni a las estreyas no les importamos. El mundo va kontinuar a djirar si estamos triste, felizes o muertos. I es por esto ke devemos de bivir kada momento kon gusto. Es por esto ke esto eskrivyendo oy en esta lingua ke tiene puede ser mas de mil anyos, ke apartyene a muestras madres i padres, una kultura ke se formo alrededor de la Mediterranea. Empesó ay mas de tres mil anyos en Israel antiguo, despues viyajo a l’oeste a Espanya i despues torno otra vez al Levant. Esta kultura unika ke mos ambezo a protejar muestra tradisyon, yevar la alegria de vida kon las dichas, komidas i kantikas. 

 

El filozofo Arthur Schopenhauer eskrive ke la vida se puede komparar kon una broderiya. Durante la primera mita de su tiempo, una persona ve el lado derecho i durante la segunda mita el mal. Lo de detras de una broderiya no es muy bueno a mirar komo el derecho, pero es mas instruktivo porke mos mostra la forma komo los ilos lavoraron endjuntos. 

 

La verdad es ke lo ke ay en la parte obskura de la luna es mas o menos mizmo a lo ke estamos viyendo en la parte briyante. Lo ke es importante es de aklarar muestras partes obskuras i lavorar para aktualizar muestro potensiyal. 

 

 

Siz de yorumunuzu yapın

Tüm Yorumları Görün
Yorum Yapmak için üye girişi yapın!Yorum yapabilmek için üye girişi yapmanız gerekiyor...
Üye Girişi yapmak için Tıklayın

İLGİLİ HABERLER

İLGİNİZİ ÇEKEBİLİR

gazete sayfası

Tünelin Ucu-İzel ROZENTAL

Tünelin Ucu-İzel ROZENTAL