A la fin del enverano del anyo 1954, Jules Schulback, un judyo aleman, produktor de filmos de kaza, oyo ke Marilyn Monroe iva estar en el este de Manhattan filmando senas por su muevo filmo, "The Seven Year Itch". Dos diyas antes, Schulback aviya travado fotografiyas de Monroe en su kaza kon su kamera de sinema Bolex de 16 milimetros.
Presto, Schulback apanyo su kamera, kon lakel el travava videos de piknikes, i senas de la vida kotidyana, i se dirijo a la kaye ande se iva travar el filmo ‘The Seven Year Itch’.
Mezmo ke la ora estava una de la noche, muncha djente se aviya arekojido, fotografos de jurnales, i ombres kuryozos esperando para ver Marilyn Monroe. Monroe aviya konvensido el estudyo de sinema i el direktor, Billy Wilder, para ke enviten la prensa i el publiko para ke se avle sovre su rolo en este muevo filmo.
La sena del filmo era ansina: ‘Un ombre i una mujer, vestidos de gala, kon vistidos de kokteyl blanko, estan salyendo de un sinema de Manhattan. Estan en pyes asperando ke venga el treno. Entremyentes un treno paso de aya i izo un poko de ayre. ‘Ohh, me arefreski un poko’ disho Marlyn Monroe. Ma, en realidad, el ayre estava vinyendo de un vantilator ke el shef de efektos espesyales del filmo aviya metido debasho, para ke el fostan de Monroe se alevante.
La djente empeso a gritar: “Mas ariva! Mas ariva!". El fostan de Monroe estuvo bolando fina su kavesa. Mas muncha djente se estuvo aretando, los ombres estuvyeron mirando de los edifisyos, otro un poko ya se ivan a kayer de las ventanas.
Malorozamente, el marido de Monroe, Joe DiMaggio aviya vinido para akompanyar a su mujer. Joe DiMaggio no teniya entisyon de vinir al set akeya noche, i estava asperando a su mujer en el Hotel St. Regis, ande se estavan kedando. Ma, le aviyan rekomendado ke venga al set i ke no deshe a su mujer sola. Monroe no keriya ke su marido este aya. Por esto, estava un poko inyervoza. Kuando el fostan de Monroe se alevanto fina la kavesa, i la djente empeso a gritar ‘Mas ariva!’, Joe DiMaggio kon inyervos se alesho del set.
