20 Ocak 2021 Çarşamba 15:56
2n14

Una Menora Antigua en Antalya

Judeo-Espanyol 1763 görüntüleme
28 Nisan 2020 Salı

Kenan Cruz Çilli

 

En el anyo 2009, un grupo de arkeologos ke estavan lavorando en la sivdad antigua de Andriake en la provinsia de Antalya, izyeron una deskuvyerta muy grande i emosyonante. Este grupo topo las ruinas de una sinagoga muy muy antigua. No esto eskriviyendo de una sinagoga sefaradi de kinyentos anyos, ama de una sinagoga ke fue fraguada kaji mil anyos antes ke yegaron los primeros sefaradis. Es realmente un lugar muy importante para la istoria de los djudios en Turkiya. Endjuntos kon la sinagoga, el grupo de arkeologos topo varias piedras kon simbolos djudios. Unas ya estavan muy rotas i nesesitavan muncho tiempo i lavoro duro para arekojer las piesas i endjuntarlas, ama una piedra maraviyosa se topo kaji sin dingun danyo. Esta piedra, komo vesh en la fotografiya, es una grande reprezentasyon de una menora. A serka de la menora, tenesh mas simbolos djudios. Meldi ke el objeto en la derecha es un shofar i en la siedra se topa un etrog i lulav. Las eskritas kon letras gregas arriva tambien azen referensiya al djudaizmo. Sigun un artikolo ke meldi, en estas eskritas se topa la segunda mas vieja referensiya a Israel ke fue topada en las tierras de Anatolia (La primera esta en una tumba en la sivdad antigua de Lykaonia).

Entonses ande está esta piedra agora? Los arkeologos ke izyeron deskuvyertas muy grandes en Andriake lavoraron djuntos kon el ministerio de kultura i turizmo, i dieron karar de transformar Andriake en un muzeo. Entonses en 2016, la sivdad antigua ke es agora un parko arkeolojiko, i el Muzeo de las Sivilizasyones de Likya (Likya Medeniyetleri Müzesi) avrieron sus puertas al publiko. Yo vijiti el muzeo muevo despues ke fue avyerto i kreyo ke es un lavoro maraviyozo. Puede ser uno de los muzeos muevos mas luzyos en muestro payiz. Puedesh ver una sisterna grande i kompleta, las ruinas de iglesyas i de la sinagoga, i tambien la rekonstruksyon de una barka de la epoka (Andriake era un puerto muy importante por los merkadores). A mi me dyo muncho plazer la vijita. 

Fuera de Andriake tambien ay otras kozas interesantes para vijitar. Por egzemplo en la sivdad mas serka, Demre, se topa la iglesya famoza de St. Nikolas, un santo kristiyano ke nasyo muy serka i ke muriyo aya. St. Nikolas es un santo ke es muy importante porke la figura famosa i moderna de Papa Noelfue inspirada por el. Entonses munchos turistos vyenen a Demre para vijitar esta iglesiya ke oy tambien es muzeo. I klaro, komo estamos avlando de Antalya, no puedemos olvidar ke tambien ay sentenas de plajes luzyas para deskansar despues de vijitar todos estos lugares. Ayde, akodravos de este lugar para las vakasyones despues del Corona! Ke yegen presto presto!

 

 

Siz de yorumunuzu yapın

Tüm Yorumları Görün
Yorum Yapmak için üye girişi yapın!Yorum yapabilmek için üye girişi yapmanız gerekiyor...
Üye Girişi yapmak için Tıklayın

İLGİLİ HABERLER

İLGİNİZİ ÇEKEBİLİR

GZ

MOZOTROS AİLESİ

MOZOTROS AİLESİ

TÜNELİN UCU

TÜNELİN UCU