UN PESAH DIFERENTE DE LOS OTROS

Dora NİYEGO Judeo-Espanyol
8 Nisan 2020 Çarşamba

Komo lo savemos todos, para los judyos en Pesah, es kostumbre ke las famiyas enviten los paryentes a sus kazas para los Sederes; las mujeres azen komidas rituales ke konektan el prezente i el pasado. Se melda la Agada endjuntos i komemoramos la liberasyon del esklavaje de Ejipto. Ma malorozamente, esto no se va pueder repetar este anyo por modo del koronavirus. Todos los judyos en el mundo entero, van a avlar kon las famiyas por video, se van a suetar feliz fiesta unos a los otros. Este anyo no va aver munchas personas en las kazas. En kada kaza vamos a estar dos u kuatro personas alrededor del Seder. Ansi, puede ser ke en el mundo entero, se va ampesar muevas formas de estar endjuntos. Los diyas de korona ya van a pasar, ma munchas kozas va trokar en el mundo. Ma no kreygo ke va trokar por bueno. La entimidad, la alegriya de estar endjuntos va desapareser parese.

El Seder de Pesah es sentrado en la eksperiensya de ser ekspulsados de muestras kazas, ma estos diyas esta afitando el kontraryo, mos estamos sintyendo emprizonados en muestras kazas. La istoria de Pesah mos konta las plegarias ke les vino a a la kavesa de los ejipsyanos i ke por mozotros eran mirakolos ke el Dio izo para salvarmos. Komo de kuryozo, oy estamos rogando ke eskape una plegaria. Las Sinagogas ke mos konektan kon el Dio estan vaziyas i van a estar vaziyas en los diyas de Pesah. En meldando la Agada dizimos: "Todos los ke tienen ambre ke vengan i koman". En estos diyas, dingunos no pueden vinir a muestras kazas, munchos de mozotros no estamos puedyendo estar en la mizma kaza kon muestros padres o ijos. No mos estamos puedyendo mizmo aserkar de eyos.

Estamos desilluzionados porke no vamos a pueder selebrar la fiesta en la forma ke estamos auzados. Ma, mos akodraremos de la matsa, la galeta sin levadura ke komemos porke los judyos salyeron koryendo de sus kazas antes ke el pan pudo kreser. Toda la fiesta se baza en glorifikar un momento de la vida mezmo si la vida no esta pasando de una manera komo lo esperamos. En la istorya, mezmo en estos momentos, los judyos toparon liberasyon. 

En la istoria, los judyos obzervaron Pesah en munchas sirkonstansyas terrivles. Durante el Olokosto, obzervaron el Pesah en getos, en kampos de konsantrasyon. Penaron para pueder azer un pedasiko de matsa i dizir la Agada. No solo en el Olokosto, en munchos otros diyas de esklavaje, (un otro egzamplo komo en Rusia), los judyos no mankaron de mirar al Pesah.

La situasyon de oy es muy diferente. Mezmo si las nonas i nonos no estan puedyendo ver los inyetos i los ijos, eyos estan anturados de sus amor. Aunke no los estan puedyendo vijitar, les estan trayendo todo lo ke tienen menester.

Las kreaturas estan en kaza diya entero ma estan en kaza porke sus famiya i el governo los keren protejar. Los profesores les estan dando las lisyones por el internet, para ke seygan produktivos en estos diyas. No estamos puedyendo salir afuera para merkar lo ke tenemos menester ma los supermarketes mos estan azyendo servisyo kuando keremos.

No savemos lo ke va trayer los diyas sigientes ma estamos bivyendo en un mundo amorozo, ande las personas se estan unyendo para kombatir el enemigo komun, i no entre si.

 

Siz de yorumunuzu yapın

Tüm Yorumları Görün