B O H O R P A S H A

Eliz GATENYO Judeo-Espanyol
8 Nisan 2020 Çarşamba

Mi esfuegra teniya un tiyo ke se yamava Bohor. Era el marido de la tiya de mi esfuegra. Bohor era un doktor muy alavado. Vos dizere ke era el doktor del saray. Por esto lo yamavan Bohor Pasha. 

Bohor Pasha era una persona ke se mirava su keyf. Kuando uno del Saray se hazineyava, mandava el Sultan su karosa, lo tomavan de kaza i despues lo trayiyan atras. Mas no mirava otros hazinos. Diya entero meldava livros medikales i otros. Era muy buen doktor no se kere dicho. La famiya se chikinava de el.

Un diya mi esfuegra Klara, kuando era chika (Klarika) se hazineyo muy muy muncho. Teniya diyas i diyas una kayentura ke no le estava abashando. Se aviya aflakado muncho, le ampesaron a kayer los kaveyos i las unyas. Ya la yevaron a los doktores, ya la yevaron a los espitales. Nada! No aviya chare. De diya en diya un poko mas hazina se estava azyendo. A la fin disheron lo yamaremos a Bohor Pasha. I si, ken va tener ozadiya de yamarlo? Una persona tan famoza..  Avagar avagar le disho la mujer: Saves Bohor Pasha? Klarika esta muy hazina. Vamos i egzaminala te rogo. Puedeser topas una chare. Si no se va murir la poveretika.

Se alevanto Bohor i se fueron a la kaza de mi esfuegra. La poveretika estava echada depedrida kon la kara vedre/amariya. Bohor pasha la egzamino bueno bueno i le disho: “No tienes nada a si biva tu padre.”  Mas no disho nada. Le disho a la madre de Klarika ke le aga una limonata. Le izo bever la limonata. Se asento eskrivio unos polvikos i unos shurupikos a su resefta i se fueron. 

Antes no aviya komo oy kuras prontas. Yo me akodro ke los doktores eskriviyan unos polvikos ke los metiyan aryentro de kapsules komo los de gripin. O los aziyan paketikos chikos. Los kapsules eran muy difisil de englutir por modo ke eran mas grande del garon i los paketikos eran muy difisil de beverlos por ke teniyan una savor amarga. Se fueron a la farmasiya, dieron a azer las kuras. I ampeso Klarika a bever las kuras. Mirakulozamente avagar avagar se ampeso a azerse kada diya mas buena de antes. Los kaveyos i las unyas le kresyo demuevo. Ansina se melizino por entero mi esfuegra.

Komo Bohor Pasha, teniyamos munchos doktores judios ke fueron doktores del Saray Otomano.

Mizmo despues, Atatürk teniya su doktor Abrevaya Marmaralı, una persona eminente de muestra komunita.  El, sinyo kon otros doktores tanbien, el raporto de la muerte de Atatürk. 

Siz de yorumunuzu yapın

Tüm Yorumları Görün