Kenan CRUZ ÇİLLİ
Los haberes del koronavirus yegaron i agora ya okupan kompletamente todo lo ke vemos en la televizyon, en el internet, i es kaji la unika tema de las konversasyones entre mozotros todos. Kuando la situasyon en la Italya se izo terrivle, la djente empeso a espantarse mas i mas. En la ultima semana el virus ya yego a la Turkiya i en todo el mundo ay kada vez mas i mas kavzos de kontajyo i malorozamente el numero de muertes tambiyen esta siempre suvyendo. Todos pueden ser afektados por este virus. Las universidades estan serradas, la djente ke puede ya esta lavorando en kaza, estamos evitando los grandes kalabalikes, i sovre todo estamos todos muy mirikiyozos.
Aki en Portugal la situasyon esta kada vez peor. Todos los diyas ay mas i mas personas infektadas en el payiz. Muncha djente esta en panik i las autoridades ya seraron las eskolas, universidades, sinemas, muzeos, i munchos otros servisiyos publikos. Komo esto aki vijitando mi granmama, mozotros dimos el karar de kedarmos en kaza i evitar el de tener kontakto kon djente ke kontinua saliendo i lavorando afuera. Kuando primero empesimos, yo pensi ke seriya buena oportunidad para meldar mis livros, telefonar a mis amigos, ver mis telenovelas en mi netflix, i klaro para deskansar. Ama agora ya entendi ke no es ansina tan kolay!
Kuando no puedesh salir, la unika koza ke keresh azer es salir! Solo pasaron dos diyas dezde ke empesimos muestra karantina i yo ya esto kansado de pasar mis diyas azyendo nada! Ama no ay otra opsyon. Esto es un kavzo de salud publiko i todos kale ke agamos muestros doveres komo miembros de muestras komunidades. Para eskapar keriya kompartir una koza ke meldi en twitter: “A todos ke merkaron 28 paketes de pasta! A todos ke estan bushkando desinfektantes de las manos en el merkado negro! A todos ke estan kaminando kon una maska en la kara! I a todos ke kerian fuyir kon sus ijos de una zona infektado por el korona virus: nunka mas menospresiad a la djente ke esta fuyendo de la gerra i de la ambre”.
